बादरेभीरमा विद्युतीय सवारीसाधन (इभी) दुर्घटना: ११ जना घाइते

मकवानपुर, कात्तिक २ गते । मकवानपुरको भीमफेदी गाउँपालिका–१ बादरेभीरमा विद्युतीय सवारीसाधन (इभी) दुर्घटना हुँदा ११ जना यात्रु घाइते भएका छन्। काठमाडौँबाट गौरतर्फ जाँदै गरेको बा.प्र.०३–००१ ज ०६७४ नम्बरको भाडाको इभी आइतबार दिउँसो अनियन्त्रित भई दाहिनेतर्फको भित्तामा ठोक्किएर बायाँतर्फको नालामा खसेको हो।

दुर्घटनाको खबर प्राप्त हुनासाथ प्रहरी चौकी भैँसेबाट खटिएको टोलीले घाइतेहरूको उद्धार गरी उपचारका लागि हेटौँडा अस्पताल पठाएको जिल्ला प्रहरी कार्यालय मकवानपुरका सूचना अधिकारी एवम् प्रहरी नायब उपरीक्षक माधवप्रसाद काफ्लेले जानकारी दिनुभएको छ। घाइतेहरूमध्ये एक परिवारका सदस्यलाई थप उपचारका लागि चितवनस्थित सिएमसी अस्पताल पठाइएको छ।

दुर्घटनामा रौतहटको दुर्गाभगवती गाउँपालिका–१ का ३२ वर्षीय राजेश साह, भारत मोतिहारीका ३४ वर्षीय सर्फे आलम, सोही ठाउँका ५० वर्षीय हरि साह, उहाँका छोरीहरू २६ वर्षीया चन्दा कुमारी साह, २३ वर्षीया शिवा कुमारी साह तथा नातिनातिनाहरू पाँच वर्षीय आर्यन साह, शान्ति कुमारी साह र शिवान्स साह घाइते भएका छन्। त्यसैगरी, रौतहटका सबिता कुमारी चौधरी, राहुल ठाकुर र विजय कुमार ठाकुर पनि घाइते भएको र उनीहरूको शरीरका विभिन्न भागमा चोट लागेको प्रहरीले जनाएको छ।