पाँचौँ दिनमा चलचित्र ‘बा : एक योद्धा’ लाई दर्शकको उल्लेख्य साथ: ५० प्रतिशत छुट र सो सङ्ख्या थप

काठमाडौँ, असोज १६ गते । शुक्रबारदेखि देशभरका सिनेमा घरहरूमा प्रदर्शनमा आएको नेपाली चलचित्र ‘बा : एक योद्धा’ ले प्रदर्शनको पाँचौँ दिनसम्म आइपुग्दा दर्शकको उल्लेख्य साथ पाएको छ। सुरुवाती तीन दिन लगातारको वर्षाका कारण अपेक्षाकृत कम दर्शक पाएको चलचित्रले मङ्गलबारदेखि भने हलहरूमा दर्शकको उपस्थिति र चाप बढाएको हो।

मङ्गलबारदेखि लागू भएको ‘डिल डे’ (५० प्रतिशत छुट) को प्रभावसँगै चलचित्रका अधिकांश शोहरूमा दर्शकको चाप बढेको निर्माण तथा वितरण पक्षले जनाएको छ। मङ्गलबार देशभर ७९ शो पाएको चलचित्रका थुप्रै शोहरू हाउसफुल भएपछि बुधबारदेखि शो सङ्ख्या बढाएर १०० भन्दा बढी पुर्‍याइएको छ। काठमाडौँ उपत्यकालगायत मोफसलका मल्टिप्लेक्सहरूमा समेत दर्शकको माग अनुसार थप शोहरू थपिएका छन्।

चलचित्र हेरेका अधिकांश दर्शकले यसको भावनात्मक कथावस्तुको प्रशंसा गर्दै आफूहरूलाई रुवाएको र भावुक बनाएको प्रतिक्रिया दिएका छन्। विशेष गरी वृद्ध उमेरका बुवाआमाले सन्तानको भविष्यका लागि गर्ने जीवनभरको त्याग, सङ्घर्ष र वृद्धावस्थामा भोग्नुपर्ने पीडालाई चलचित्रले जीवन्त रूपमा प्रस्तुत गरेको दर्शकहरूको भनाइ छ।

हरि लम्सालको लेखन तथा निर्देशनमा बनेको यस चलचित्रमा दिव्यदेव, झरना थापा, सुहाना थापा, माओत्से गुरुङ, अनिल बुढाथोकी, सागर खनाललगायतका कलाकारहरूको अभिनय रहेको छ। आर्टिस्टिक इन्टरटेनमेन्टको ब्यानरमा निर्मित यस चलचित्रका निर्माता वसन्त लम्साल र कार्यकारी निर्माता अनिल बुढाथोकी हुनुहुन्छ।