चलचित्र ‘कबड्डी ५’ ले तीन दिनमै कमायो ५ करोडभन्दा बढी, हलहरूमा दर्शकको चाप उच्च

काठमाडौँ, कात्तिक ९ गते । रामबाबु गुरुङको लेखन तथा निर्देशनमा तयार भएको लोकप्रिय नेपाली चलचित्र ‘कबड्डी ५’ ले प्रदर्शनको तेस्रो दिनसम्म आइपुग्दा बक्स अफिसमा ५ करोड रुपैयाँभन्दा बढीको व्यापार गर्न सफल भएको छ।

हल भिजिटका क्रममा सञ्चारकर्मीहरूसँग कुरा गर्दै निर्माता मणिराम पोखरेलले चलचित्र विकास बोर्डको तथ्याङ्कलाई उद्धृत गर्दै आइतबार दिउँसो ४ बजेसम्ममै चलचित्रले ५ करोड ५ लाखभन्दा धेरै ग्रस कलेक्सन गरिसकेको जानकारी दिएका छन्। दिउँसो ४ बजेपश्चात् पनि १ सय ५ वटा शोहरू प्रदर्शन हुन बाँकी रहेकाले मध्यरातिसम्म यो व्यापार साढे पाँच करोड पुग्ने दाबी निर्माता पोखरेलले गरेका छन्।

प्रदर्शनको पहिलो दिनदेखि नै दर्शकहरूको उत्साहजनक सहभागिता र उच्च चाप देखिएको यस चलचित्रले उत्कृष्ट प्रतिक्रिया पाइरहेको छ। सकारात्मक प्रतिक्रियाका कारण हलवालाहरूले पनि यसका शोहरू थप गरिरहेका छन् भने सोमबार केही मात्रामा शो कम भए पनि मंगलबारदेखि छुटको व्यवस्था हुने भएकाले शो संख्या पुनः बढ्ने निर्माण पक्षको विश्वास छ। देशकै ठूलो मल्टिप्लेक्स चेन क्युएफएक्स सिनेमाजले समेत यसलाई सुपरहिट घोषणा गरिसकेको छ।

बाँसुरी फिल्म्सको प्रस्तुति रहेको यस चलचित्रमा दयाहाङ राई, विजय बराल, बुद्धि तामाङ, मिरुना मगर, विपीन कार्की, सिर्जना गुरुङ, माओत्से गुरुङ, कमलमणि नेपाल लगायतका चर्चित कलाकारहरूको बलियो अभिनय रहेको छ। निर्देशक रामबाबु गुरुङसँगै मणिराम पोखरेल, मधु मिजार र विशाल गुरुङ (एलजी) ले संयुक्त रूपमा लगानी गरेको यस चलचित्रले नेपाली बक्स अफिसमा नयाँ रेकर्ड तर्फ अग्रसर हुने संकेत देखाएको छ।