दसैँ अवधिभर सुदूरपश्चिममा डेढ सयभन्दा बढी सडक दुर्घटना : ६ जनाको मृत्यु, २४३ घाइते

धनगढी, कात्तिक ९ गते । दसैँको चाडपर्व अवधिभर सुदूरपश्चिम प्रदेशमा डेढ सयभन्दा बढी सडक दुर्घटना भएका छन्।

नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय अत्तरियाका अनुसार असोज २५ देखि कात्तिक ७ गतेसम्मको अवधिमा प्रदेशभर कुल १५२ वटा सडक दुर्घटना भएका छन्। यी दुर्घटनाहरूमा परेर ६ जनाले ज्यान गुमाएका छन् भने २४३ जना घाइते भएका छन्। ज्यान गुमाउनेहरूमा कैलालीका चार र कञ्चनपुरका दुई जना रहेका सूचना अधिकारी तथा प्रहरी निरीक्षक मनिराम भट्टले जानकारी दिएका छन्।

जिल्लागत विवरण अनुसार कैलालीमा सबैभन्दा बढी ८८ वटा दुर्घटना हुँदा १४६ जना घाइते भएका छन्।

यसैगरी कञ्चनपुरमा ३५ दुर्घटनामा ५०, डडेलधुरामा १० मा १५, डोटीमा ८ मा ८, र अछाममा ५ दुर्घटनामा ८ जना घाइते भएका छन्। त्यस्तै बाजुरा र दार्चुलामा दुई–दुई तथा बझाङ र बैतडीमा एक–एक वटा दुर्घटना भएका छन्। प्रहरीको कडा निगरानी र चेकजाँचका कारण ठूला सवारीसाधनहरू ठूला दुर्घटनाबाट जोगिए पनि सबैभन्दा बढी दुर्घटना दुईपाङ्ग्रे सवारीसाधनहरू अन्य साधन (जस्तै बयलगाडा, अटो, मोटरसाइकल) मा ठोक्किएर भएको पाइएको छ।

चाडपर्वका बेला सम्भावित दुर्घटना न्यूनीकरण गर्न ट्राफिक र नेपाल प्रहरीको संयुक्त टोलीले क्षमताभन्दा बढी यात्रु बोक्ने गाडीहरूलाई कारबाही गर्नुका साथै अतिरिक्त यात्रुहरूलाई झारेर अर्को सवारीसाधनमार्फत गन्तव्यतर्फ पठाउने व्यवस्था मिलाएको थियो।

यसका साथै पहाडी क्षेत्रमा यातायातलाई सुरक्षित बनाउन ‘टाइम कार्ड’ समेत लागु गरिएको थियो। यस प्रकारका सुरक्षात्मक कदमले ठूला सवारीसाधनको दुर्घटना रोक्न सहयोग पुर्‍याए पनि दुईपाङ्ग्रे सवारी चालकहरूको लापरबाहीका कारण दुर्घटनाका घटना बढेको देखिन्छ।