मान्छेको ज्यान लिने नरभक्षी बाघ बस्तीनजिक देखापरेपछि उच्च सतर्कताको अपिल

धनगढी, असोज २२ गते । कैलालीको गौरीगङ्गा नगरपालिकामा एक जनाको ज्यान लिएको नरभक्षी बाघ गाउँ आसपासका वन क्षेत्रमा घुमफिर गर्न थालेपछि डिभिजन वन कार्यालयले सर्वसाधारणलाई उच्च सतर्कता अपनाउन र जङ्गल नजान आग्रह गरेको छ।

दुई दिनअघि गौरीगङ्गा–६, भैरव सामुदायिक वनमा चरीडाँडाका ४० वर्षीय कृष्ण चौधरीको ज्यान लिएको बाघ धनगढी उपमहानगरपालिका र कैलारी गाउँपालिका जोडिएका वन क्षेत्रतिर सरेको पाइएको छ।

डिभिजन वन कार्यालयका अनुसार बाघ मान्छे मारेको स्थानबाट सरेर धनगढी उपमहानगरपालिका–१५, १६ र १७ मा रहेका विभिन्न सामुदायिक वन तथा भारताल साझेदारी वन क्षेत्रमा घुमफिर गरिरहेको देखिएको छ। स्थानीयले धनगढी–१६ स्थित बेहडाबाबा मन्दिर तथा रामपुरगाउँ नजिक बाघ देखेका छन् भने धुरझन्ना गाउँनजिकैको सिद्धबाबा सामुदायिक वनमा बाघको ताजा पदचिह्न (पञ्जाको छाप) फेला परेको छ।

राष्ट्रिय प्रकृति संरक्षण कोष (NTNC) शुक्लाफाँटाका प्रमुख लक्ष्मीराज जोशीका अनुसार बुढो, कमजोर वा समस्याग्रस्त भएपछि बाघ बस्तीनजिक आउने र एकपटक मान्छे मारेपछि पुनः आक्रमण गर्ने उच्च सम्भावना हुन्छ। बाघको त्रास बढे पनि स्थानीयबासी दाउरा, घाँस र च्याउ सङ्कलनका लागि जङ्गल जाने क्रम अझै नरोकिएकाले जोखिम थप बढेको छ।

हाल डिभिजन वन कार्यालय र एनटिएनसीको संयुक्त प्राविधिक टोली बाघको खोजी तथा निगरानीमा परिचालित भएको छ। ड्रोन क्यामराबाट खोजी गर्दा फेला नपरेपछि बाघको गतिविधि निगरानी गर्न सम्भावित वन क्षेत्रहरूमा स्वचालित क्यामरा (क्यामरा ट्र्याप) जडान गरिएको डिभिजन वन कार्यालयले जनाएको छ।