दसैँ र खेतीपाती सकेर रोजगारीका लागि भारत फर्कने क्रम बढ्यो : नाकाबाट दैनिक पाँच सयभन्दा बढी बाहिरिँदै

कैलाली, कात्तिक १५ गते । चाडपर्व मनाउन तथा गाउँघरमा खेतीपातीको काम सकेर घर फर्किएका नेपालीहरू पुनः रोजगारीका लागि भारततर्फ जान थालेका छन्।

कैलालीको त्रिनगर–गौरीफन्टा नाका हुँदै चाडपर्व पछि रोजगारीका लागि भारत जाने नेपालीहरूको लर्को लागेको छ। त्रिनगर नाकामा खटिएको सशस्त्र प्रहरी बलका अनुसार पछिल्लो समय दैनिक करिब पाँच सय जनासम्म नेपाली नागरिकहरू रोजगारीको खोजीमा भारतका विभिन्न सहरहरूतर्फ लाग्ने गरेका छन्। नेपालमा पर्याप्त रोजगारीका अवसर नहुनु र स्थानीय स्तरमा भएको आम्दानीले दैनिक जीवनयापन धान्न कठिन हुनु नै यसरी भारत जानुपर्ने मुख्य बाध्यता रहेको उनीहरू बताउँछन्।

कैलालीको गौरीगङ्गा नगरपालिकाकी नमिता साउद र गोदावरी नगरपालिकाका रमेश विक जस्ता सयौँ नागरिकहरू दसैँको खुसी परिवारसँग साटासाट गरेर अहिले पुनः मुम्बई, पुणे, दिल्ली लगायतका भारतीय सहरतर्फ फर्कंदै छन्।

भारतमा तुलनात्मक रूपमा रोजगारी पाउन सहज हुने र कमाइ पनि राम्रो हुने भएकाले परिवारसहित वा समूह बनाएर जाने क्रम बर्षौंदेखि चल्दै आएको छ। सुदूरपश्चिमका कैलाली, कञ्चनपुरसहित विभिन्न पहाडी जिल्लाहरूबाट निर्माण, होटेल, कृषि, उद्योग तथा घरेलु कामदारका रूपमा काम गर्न नेपालीहरू भारत जाने गर्छन्।

रोजगारीका लागि भारत जानेहरूको सङ्ख्या उल्लेख्य रूपमा बढेसँगै सीमाक्षेत्रमा मानव बेचबिखन तथा विभिन्न किसिमका ठगी र जोखिमहरू हुन सक्ने आशङ्कामा निगरानीसमेत कडा पारिएको छ। त्रिनगर नाकामा कार्यरत ‘माइती नेपाल’ का प्रतिनिधिहरूले भारततर्फ जाने महिला तथा बालबालिकालाई लक्षित गर्दै विशेष निगरानी, सवारीसाधनभित्रै पुगेर परामर्श तथा आवश्यक सोधपुछका कार्यहरू गर्दै आएका छन्। दैनिक रूपमा धनगढीबाट सवारीसाधन रिजर्भ गरेर सीमासम्म पुग्नेहरूको संख्या बढेकाले सुरक्षा सतर्कता थप प्रभावकारी बनाइएको छ।

नेपालमा दिगो रोजगारीका अवसरहरू सिर्जना नभएसम्म सुदूरपश्चिमका धेरैजसो परिवारहरूको जीविकोपार्जन भारतको कमाइमै निर्भर रहने यथार्थ यस प्रवृत्तिले उजागर गरेको छ। सीमाक्षेत्रमा हुने जोखिमबाट नागरिकलाई सुरक्षित राख्न र यात्रालाई व्यवस्थित बनाउन सम्बन्धित निकायले थप सहजता र सुरक्षाका उपायहरू अपनाउनुपर्ने आवश्यकता देखिएको छ।