नितेश तिवारीको बहुप्रतिक्षित फिल्म ‘रामायणः राइज अफ अ लेजेन्ड’ को प्रिमियरपछि मिश्रित प्रतिक्रिया : भव्य क्यानभास तर प्राविधिक र भावनात्मक कमजोरीमाथि प्रश्न

काठमाडौँ, कात्तिक १४ गते । निर्देशक नितेश तिवारीको अति महत्त्वाकाङ्क्षी तथा ठूलो बजेटको फिल्म ‘रामायणः राइज अफ अ लेजेन्ड’ आगामी नोभेम्बर ५ देखि विश्वभर प्रदर्शनमा आउँदैछ।

हालै लस एन्जलसको ‘डेभिड गेफेन थिएटर’ मा भएको विशेष प्रिमियरले यसलाई सार्वजनिक प्रदर्शनअघि नै चर्चाको शिखरमा पुर्‍याएको छ। तीन घण्टाको यो फिल्मभित्र डेढ हजार पृष्ठको पौराणिक ग्रन्थ र दशकौँको कथा समेट्ने प्रयासलाई इन्डिवायरले ‘विशाल र भव्य सिनेम्याटिक उत्सव’ भनेको छ भने इन्डिया टुडेले ‘दिव्य राम’ र ‘दमदार रावण’ को प्रशंसा गरेको छ।

फिल्मको सबैभन्दा बलियो पक्षका रूपमा खलनायक रावणको भूमिकामा अभिनेता यशको अभिनय र प्रभावलाई लिइएको छ। रावणको १० वटा टाउकोलाई उसको ‘स्प्लिट पर्सनालिटी’ को रूपमा प्रस्तुत गरिनुका साथै लंकाको भिजुअल प्रस्तुतिले सबैको ध्यान खिचेको छ। ए.आर. रहमान र ह्यान्स जिमरको पहिलो संयुक्त सहकार्यले फिल्मको सांगीतिक पक्षलाई थप उचाइमा पुर्‍याएको छ। तर, यसको ठीक विपरीत मुख्य नायक रामको भूमिकामा रहेका रणबीर कपूरको चरित्र केही नीरस र आन्तरिक द्वन्द्वबिहीन देखिएको समीक्षकहरूको ठम्याइ छ।

भिजुअल र प्राविधिक पक्षमा भने समीक्षकहरूबीच ठुलो मतभिन्नता देखिएको छ। आईजीएन डटकमले १६२ मिनेटको अंग्रेजी भर्सनमा संवाद र ओठको तालमेल मिलाउन प्रयोग गरिएको ‘ब्रह्मा एआई’ प्रविधि अनौठो र हाँस्यास्पद बनेको टिप्पणी गरेको छ।

साथै, कमजोर सीजीआई, युद्धदृश्यहरू ‘वेटलेस’ हुनु, केही असुरहरू कार्टुनजस्तो देखिनु र अंग्रेजी कटमा गीत–संगीतका दृश्य काटिँदा फिल्म ‘सिरियल’ जस्तो बनेको गुनासो गरिएको छ। मुख्य नायक र खलनायकबीच भेटसम्म नभई फिल्म टुंगिनु र सीताको अपहरण नहुँदै कथा सकिनुले धेरै दर्शकलाई आधा–अधुरो अनुभव गराएको छ।

समीक्षकहरूले यसलाई मिश्रित प्रतिक्रिया दिएका छन् जहाँ इन्डिवायरले ‘बी’ ग्रेड दिएको छ भने स्क्रिन र्‍यान्टले ७/१० र आईजीएनले १० मा ४ स्टार मात्र दिएको छ। भव्य सेट, यशको दमदार अभिनय र एआर रहमानको संगीतका बाबजुद पनि कमजोर भिजुअल इफेक्ट्स, एआई डबिङको भद्दा प्रयोग र सुस्त गति जस्ता कारणले फिल्मले ‘आरआरआर’ जस्ता अघिल्ला ब्लकबस्टरहरूको स्तर भेट्न कतिको संघर्ष गर्छ, त्यो भने नोभेम्बर ५ मा हुने विश्वव्यापी प्रदर्शनले नै प्रष्ट पार्नेछ।