समाचार कक्षबाटै पत्रकार नियन्त्रणमा लिने प्रहरीको गतिविधिप्रति प्रेस काउन्सिलद्वारा आपत्ति : तत्काल रिहा गर्न माग

काठमाडौँ,कात्तिक १३ गते । प्रेस काउन्सिल नेपालले समाचार कक्षमै प्रवेश गरेर पत्रकारलाई नियन्त्रणमा लिने प्रहरीको गतिविधिप्रति कडा आपत्ति जनाएको छ। काउन्सिलले पक्राउको स्पष्ट कानुनी आधार सार्वजनिक गर्न र कुनै पनि आधारबिना नियन्त्रणमा राखिएका पत्रकारहरूलाई तत्काल रिहा गर्न जोडदार माग गरेको छ।

शुक्रबार कार्यालय समय सकिएलगत्तै विभिन्न सञ्चारमाध्यमका समाचार कक्षमा सादा पोशाकमा रहेका प्रहरीहरू प्रवेश गरी पत्रकारहरूलाई नियन्त्रणमा लिएको र पक्राउ गर्ने प्रयास गरेको घटनाले प्रेस जगतलाई स्तब्ध बनाएको काउन्सिलले जारी गरेको विज्ञप्तिमा उल्लेख छ।

पक्राउको कुनै स्पष्ट कारण नखुलाइएको, पक्राउ पुर्जी नदेखाइएको, अदालतबाट अनुमति लिइएको नदेखिएको तथा अपराधको जाहेरी परेको विषयसमेत अस्पष्ट रहेको अवस्थामा लगातार दुई दिन सार्वजनिक बिदा पर्नुअघि यसरी पत्रकारलाई पक्राउ गरिनु गम्भीर आपत्तिको विषय भएको काउन्सिलको ठहर छ। प्रहरी प्रधान कार्यालयबाट जारी विज्ञप्तिको पृष्ठभूमिमा भएको यो घटनाले प्रेस स्वतन्त्रता र पत्रकारहरूको व्यावसायिक सुरक्षामाथि नै गम्भीर प्रश्नचिह्न खडा गरेको छ।

सञ्चारमाध्यममा प्रकाशित हुने समाचार सामग्रीहरूप्रति कुनै पनि किसिमको असहमति वा आचारसंहितासम्बन्धी उजुरी भएमा त्यसको छानबिन, अनुगमन र निरूपण गर्ने मुख्य कानुनी जिम्मेवारी प्रेस काउन्सिलको भएको स्मरण गराइएको छ। “समाचारकै विषयमा सिधै प्रहरी परिचालन गर्नुको सट्टा काउन्सिलको स्थापित विधि र प्रक्रियाबाट समाधान खोज्न नेपाल सरकार, प्रहरी प्रशासन तथा सम्बद्ध सबै पक्षलाई काउन्सिल आग्रह गर्दछ,” विज्ञप्तिमा भनिएको छ। काउन्सिलले नियन्त्रणमा लिइएका पत्रकारको अवस्था र पक्राउको कानुनी आधार तत्काल सार्वजनिक गर्न जोड दिएको छ।

साथै, काउन्सिलले पत्रकार तथा सञ्चारमाध्यमहरूलाई पनि सत्यतथ्यमा आधारित रही पत्रकार आचारसंहिताको पूर्ण पालना गर्न विशेष अनुरोध गरेको छ। लोकतान्त्रिक समाजमा प्रेस स्वतन्त्रता र अभिव्यक्ति स्वतन्त्रताको रक्षा गर्नु राज्यको दायित्व भएकाले यस किसिमका गैरकानूनी गतिविधिहरू दोहोरिन नदिन सम्बन्धित सबै पक्ष गम्भीर बन्नुपर्नेमा जोड दिइएको छ।

प्रेस काउन्सिल नेपालको विज्ञप्ति