सेयर बजार सामान्य अङ्कले घट्यो : नेप्से परिसूचक ५.४५ अङ्कले ओरालो लाग्दा ८ अर्ब ८९ करोडको कारोबार

काठमाडौँ,कात्तिक १३ गते । धितोपत्र बजारमा सेयर कारोबार मापक नेप्से परिसूचक सामान्य अङ्कले घटेको छ। नेपाल स्टक एक्सचेञ्ज (नेप्से) का अनुसार आज नेप्से परिसूचक ५.४५ अङ्कले घटेर २ हजार ६९० दशमलव १५ मा पुगेको छ।

त्यस्तै, ठूला कम्पनीहरूको कारोबार मापन गर्ने सेन्सेटिभ परिसूचक ०.५४ अङ्कले घटेर ४८७ दशमलव ६६ मा झरेको छ भने फ्लोट सूचक ०.३६ अङ्कले घटेर १८६ दशमलव ६४ मा र सेन्सेटिभ फ्लोट सूचक ०.१७ अङ्कले घटेर १६५ दशमलव १६ मा पुगेको छ।

बजार सामान्य अङ्कले घटे पनि कारोबार रकममा भने चहलपहल नै देखिएको छ। आज विभिन्न कम्पनीका कुल दुई करोड २८ लाख ६२ हजार ५५४ कित्ता सेयरहरू ८ अर्ब ८९ करोड १५ लाख ९५ हजार १४५ रुपैयाँ बराबरको मूल्यमा खरिदबिक्री भएका छन्। बजारमा कुल १३ वटा उपसमूहहरूमध्ये ५ वटा उपसमूहका सूचकहरू बढेका छन् भने बाँकी ८ वटा उपसमूहका सूचकहरू घटेका छन्।

कारोबारमा आएका कम्पनीहरूमध्ये आज १०२ वटा कम्पनीको सेयर मूल्य बढेको छ भने १६९ वटा कम्पनीको सेयर मूल्य घटेको छ। यसैगरी, ८ वटा कम्पनीको सेयर मूल्य भने स्थिर रहेको छ। बजार समग्रमा राताम्मे देखिए पनि केही कम्पनीका लगानीकर्ताहरूले भने राम्रै आम्दानी गर्न सफल भएका छन्।

नेप्सेका अनुसार आज बेनी हाइड्रोपावर, स्वाभिमान लघुवित्त वित्तीय संस्था र लुम्बिनी विकास बैंक लगायतका कम्पनीका लगानीकर्ताहरूले सर्वाधिक कमाएका छन्। यता, मेन्छियम हाइड्रोपावर, सुपरखुदी हाइड्रोपावर र सोपान फार्मास्यूटिकल्स लगायतका कम्पनीका लगानीकर्ताहरूले भने सर्वाधिक गुमाउन पुगेका छन्।