चक्रवात ‘अर्णब’ को प्रभाव : मुस्ताङमा मौसम प्रतिकूल बन्ने भएपछि पर्यटक तथा तीर्थयात्रीहरू फर्कन थाले

काठमाडौँ, कात्तिक १२ गते । बङ्गालको खाडीमा विकसित भएको शक्तिशाली चक्रवात ‘अर्णब’ को प्रभावले कात्तिक १३ र १४ गते भारी वर्षा, चट्याङ तथा हिमपात हुने सम्भावना बढेसँगै मुस्ताङमा पर्यटकहरूको सङ्ख्या घट्न थालेको छ।

दसैँलगत्तै मुस्ताङमा पर्यटकको चहलपहल उल्लेख्य रूपमा बढेको भए पनि प्रतिकूल मौसमको पूर्वसूचनाले गर्दा त्यहाँ पुगेका पर्यटक तथा तीर्थयात्रीहरूले आफ्नो यात्रा छोट्याएर फर्कन थालेका छन्। मौसमसम्बन्धी सचेतनाका कारण यसपटक पदमार्गमा अलपत्र पर्ने पर्यटकहरूको सङ्ख्यामा कमी आएको छ।

जिल्ला प्रहरी कार्यालयको घाँसा चेकपोस्टको तथ्याङ्क अनुसार पछिल्लो समय मुस्ताङ प्रवेश गर्नेभन्दा बाहिरिनेहरूको सङ्ख्या उच्च रहेको छ। प्रहरी निरीक्षक सन्तोष बस्यालका अनुसार हालैको तथ्याङ्क अनुसार सडक मार्गबाट दुई हजार ८३४ जना पर्यटक मुस्ताङ प्रवेश गरेका थिए भने तीन हजार ३१२ जना पर्यटक बाहिरिएका छन्। त्यस्तै, मनाङबाट ५ हजार ४०० मिटर उचाइको थोरङ्ला पास पार गरेर ५३९ जना विदेशी पदयात्री मुस्ताङ भित्रिएका छन् भने थोरङ्ला पासबाट पनि यात्रा छोट्याएर सुरक्षित स्थानतर्फ फर्किनेहरूको सङ्ख्या बढेको छ।

मुस्ताङका प्रमुख जिल्ला अधिकारी पर्शुराम पोख्रेलले साहसिक पर्यटकीय पदमार्गमा रहेका पर्यटकहरूलाई विभिन्न सञ्चार माध्यममार्फत छिटोभन्दा छिटो सुरक्षित बस्तीहरूमा फर्कन अनुरोध गरिएको जानकारी दिनुभएको छ। प्रजिअ पोख्रेलका अनुसार मुस्ताङ–मनाङ जोड्ने सरिबुङ पास, मोसोकुन्दो पास र मुस्ताङ–डोल्पा जोड्ने याकखर्क क्षेत्रमा भने हाल कुनै पनि पर्यटक नरहेको विवरण प्राप्त भएको छ। यद्यपि, थोरङ्ला पास तथा म्याग्दी–मुस्ताङ जोड्ने धौलागिरि पदमार्गमा रहेका पर्यटकलाई सुरक्षित तवरले झिकाउने काम भइरहेको छ।

प्रशासनले पदमार्गमा रहेका पर्यटकहरूलाई बाटामा निरन्तर मौसमसम्बन्धी जानकारी दिने र सुरक्षित स्थानमा बस्न आग्रह गर्ने गरिएको जनाएको छ। मौसममा सुधार नआएसम्म उच्च हिमाली तथा पदमार्ग क्षेत्रको यात्रा नगर्न र सतर्कता अपनाउन सम्बन्धित सबै पक्षलाई सचेत गराइएको छ।