सुदूरपश्चिम रोयल्सको एनपीएलमा पहिलो जित : पोखरा ६ विकेटले पराजित

काठमाडौँ, कात्तिक ११ गते । दीपेन्द्रसिंह ऐरी र इशान पाण्डेले ७४ रनको ठोस साझेदारी गरेपछि सुदूरपश्चिम रोयल्सले नेपाल प्रिमियर लिग (एनपीएल) क्रिकेटमा विजयी लय समातेको छ।

पहिलो खेलमा लुम्बिनी लायन्ससँग ७ विकेटले पराजित भएको सुदूरपश्चिमले यसपटक पुनरागमन गर्दै उत्कृष्ट प्रदर्शनका आधारमा ६ विकेटको सहज विजय निकालेको हो। त्रि.वि. अन्तर्राष्ट्रिय क्रिकेट मैदान कीर्तिपुरमा टस हारेर पहिले ब्याटिङको निम्तो पाएको पोखराले निर्धारित २० ओभरमा ७ विकेट गुमाएर १ सय ४५ रनको योगफल तयार पारेको थियो। जवाफमा उत्रिएको सुदूरपश्चिमले कप्तान दीपेन्द्र र इशानको सानदार ब्याटिङ मद्दतमा १६.५ ओभरमै ४ विकेट गुमाएर लक्ष्य पूरा गर्‍यो।

पोखराका लागि बंगलादेशी ओपनर माहेदी हसनले ३२ र अर्जुन घर्तीमगरले अविजित २५ रन बनाए पनि अन्य ब्याटरहरू टिकेर खेल्न सकेनन्। कप्तान कुशल भुर्तेलले २१ तथा सकिब अल हसनले १४ रन जोडे। सुदूरपश्चिमका बलर अनिल खरेलले घातक बलिङ गर्दै ३ विकेट लिए भने स्कट कुग्लेन, हेमन्त धामी र कप्तान दीपेन्द्रसिंह ऐरीले १–१ विकेट हात पारे। मध्यम योगफल पछ्याउने क्रममा सुदूरपश्चिमको सुरुआत राम्रो नभए पनि मध्यक्रमका ब्याटरहरूले सम्हालिनु पर्ने दबाबलाई चिर्दै उत्कृष्ट साझेदारी गरे।

इशान पाण्डे ३१ बलमा ३७ रन (२ चौका र २ छक्का) बनाएर आउट भए भने उनका स्थानमा क्रिजमा आएका सेरफन रदरफोर्डले २ बलमै छक्का प्रहार गर्दै ८ रनमा अविजित रहे। कप्तान दीपेन्द्रसिंह ऐरीले ३६ बलमा ४ चौका र २ छक्कासहित सर्वाधिक ५१ रनको योगदान दिए। दीपेन्द्रले नै पोखराका कप्तान कुशल भुर्तेलको बलमा छक्का प्रहार गर्दै आफ्नो अर्धशतक पूरा गर्नुका साथै टिमलाई विजयी बनाएका थिए। उत्कृष्ट अलराउन्ड प्रदर्शन गरेका दीपेन्द्र ‘प्लेयर अफ द म्याच’ घोषित भए।

यस जितसँगै सुदूरपश्चिमले प्रतियोगितामा आफ्नो बलियो उपस्थिति जनाएको छ भने पहिलो खेलमै हार बेहोरेको पोखराले आगामी खेलहरूमा सुधार गर्नुपर्ने दबाब बढेको छ। पछिल्ला संस्करणहरूमा फाइनलसम्म पुगेर पनि उपाधिविहीन बनेको सुदूरपश्चिम यसपटक भने सुरुवातमै आफ्नो लय समात्दै उच्च मनोबलका साथ अघि बढेको छ।