बालबालिका, गर्भवती तथा मधुमेहका बिरामीलाई इनर्जी ड्रिङ्क्स नपिउन विभागको आग्रह : दैनिक दुई क्यानभन्दा बढी सेवन नगर्न सुझाव

काठमाडौँ, कात्तिक ११ गते । स्वास्थ्य तथा खाद्य स्वच्छता मन्त्रालय अन्तर्गतको खाद्य प्रविधि तथा गुण नियन्त्रण विभागले इनर्जी ड्रिङ्क्सको सुरक्षित उपभोगसम्बन्धी निर्देशिका जारी गर्दै विशेष संवेदनशील समूहलाई यसको सेवनबाट टाढै रहन आग्रह गरेको छ।

विभागले बालबालिका, गर्भवती तथा सुत्केरी महिला, मधुमेह लगायतका दीर्घ रोगीहरू तथा क्याफिनप्रति संवेदनशील व्यक्तिहरूलाई इनर्जी ड्रिङ्क्स पूर्ण रूपमा नपिउन सुझाव दिएको छ। साथै, सेवन गर्न मिल्ने स्वस्थ व्यक्तिहरूले पनि एक दिनमा दुई क्यानभन्दा बढी इनर्जी ड्रिङ्क्स सेवन गर्न नहुने स्पष्ट पारेको छ।

हाल नेपालमा १७ वटा उद्योगले सम्बन्धित निकायबाट अनुमति लिई इनर्जी ड्रिङ्क्स उत्पादन तथा बिक्रीवितरण गर्दै आएका छन्। प्रयोगशाला विश्लेषण तथा लेबल विवरणअनुसार यस्ता पेयपदार्थको प्रतिक्यान १०० मिलिग्राम क्याफिन प्रयोग भएको पाइएको छ। युरोपेली खाद्य सुरक्षा प्राधिकरण (इएफएसए) र अमेरिकी खाद्य तथा औषधि प्रशासन (युएसएफडीए) को मापदण्डअनुसार स्वस्थ वयस्कले दैनिक ४०० मिलिग्रामसम्म क्याफिन लिन सक्ने वैज्ञानिक आधार भए पनि नेपालमा उत्पादित इनर्जी ड्रिङ्क्समा यो सीमाको २५ प्रतिशतभन्दा कम क्याफिन प्रयोग भएको विभागले जनाएको छ।

विभागले इनर्जी ड्रिङ्क्सलाई पानी, दूध, जुस वा मोहीजस्ता पौष्टिक पेय पदार्थको विकल्पका रूपमा प्रयोग नगर्न र अन्य पेय पदार्थमा मिसाएर सेवन नगर्न समेत सचेत गराएको छ। उत्पादक तथा विक्रेताहरूलाई प्रचलित कानुनबमोजिम अनुमति लिएर मात्र विज्ञापन गर्न तथा उत्पादनको लेबलमा सुरक्षित उपभोगसम्बन्धी चेतावनी सन्देश स्पष्ट रूपमा राख्न निर्देशन दिइएको छ।

खाद्य स्वच्छता तथा गुणस्तर ऐन, २०८१ विपरीत कार्य गर्ने व्यवसायीहरूलाई कानुनबमोजिम कडा कारबाही गरिने चेतावनीसमेत विभागले दिएको छ। वैज्ञानिक तथ्य र अन्तर्राष्ट्रिय मापदण्डका आधारमा खाद्य पदार्थको गुणस्तर कायम गर्न र उपभोक्ताको स्वास्थ्य सुरक्षालाई प्राथमिकतामा राख्न सरोकारवाला सबै पक्षलाई आग्रह गरिएको छ।