काठमाडौँका विभिन्न फ्ल्याटमा चोरी गर्ने चार भारतीय नागरिक पक्राउ : सुन, चाँदी र नगद बरामद

काठमाडौँ, कात्तिक १० गते । काठमाडौँका विभिन्न स्थानमा घर तथा फ्ल्याटमा मानिस नभएको मौका छोपी नगद र सुन-चाँदीका गरगहना चोरी गर्ने चार जना भारतीय नागरिकलाई प्रहरीले पक्राउ गरेको छ।

काठमाडौँ उपत्यका अपराध अनुसन्धान कार्यालयको टोलीले विशेष अनुसन्धानपछि कलङ्की क्षेत्रबाट उनीहरूलाई पक्राउ गरेको हो। पक्राउ पर्नेमा भारतको बिहार राज्यको समस्तीपुर घर भई हाल कालीमाटी बस्ने २५ वर्षीय विकास पोदार, १९ वर्षीय राजुकुमार (राजु) पोदार, २३ वर्षीय राजेन्द्र पोदार (राजेन्द्र कुमार) र ४६ वर्षीया विणा देवी रहेका छन्।

कार्यालयका प्रहरी उपरीक्षक रामेश्वर कार्कीका अनुसार पक्राउ परेकाहरूले गत कात्तिक ७ गते कलङ्कीको तासिङडोल मार्गमा बस्ने सीता थपलियाको फ्ल्याटमा कोही नभएको मौका छोपी ढोकाको ताला फोडेर नगद तथा गरगहना चोरी गरेका थिए। अनुसन्धानको क्रममा उनीहरूले त्यसको अघिल्लो दिन अर्थात् कात्तिक ६ गते बिहान पनि कलङ्कीकै रञ्जित कोलोनीस्थित नीरञ्जन नेपालको घरमा चोरी गरेको खुलेको छ। लगातार दुई दिन चोरीका घटना भएपछि सक्रिय बनेको प्रहरीले उनीहरूलाई चोरी गरिएका गरगहना र नगदसहित पक्राउ गर्न सफल भएको हो।

प्रहरीले पक्राउ परेका चारै जनालाई आवश्यक अनुसन्धान तथा कानुनी कारबाहीका लागि प्रहरी वृत्त, कालीमाटी पठाइएको जनाएको छ। चाडपर्व वा घरमा मानिस नभएको समय पारेर हुने यस्ता आपराधिक गतिविधिप्रति सचेत रहन र सुरक्षा सावधानी अपनाउन प्रहरीले सर्व-साधारणलाई आग्रह गरेको छ।