“चुनावमा हार्दैमा निराश हुनुपर्दैन, कमी-कमजोरी सच्याएर जनताको विश्वास जित्नुपर्छ”

काठमाडौँ, कात्तिक १० गते। नेपाली कांग्रेसका महामन्त्री प्रदीप पौडेलले चुनावमा हारजित स्वाभाविक प्रक्रिया भएकाले हारबाट निराश नभई विगतका कमी-कमजोरी सच्याएर अघि बढ्नुपर्ने बताएका छन्।

नेपाली कांग्रेस प्रतिनिधिसभा क्षेत्रीय कार्यसमिति क्षेत्र नम्बर १ तनहुँद्वारा मंगलबार आयोजित पदस्थापन तथा दसैँ–तिहारको शुभकामना आदान-प्रदान कार्यक्रमलाई सम्बोधन गर्दै उनले जनताको विश्वास जितेर कांग्रेसलाई पुनः विजयी बनाउने गरी कार्यक्षेत्रमा खटिन नेता तथा कार्यकर्ताहरूलाई निर्देशन दिए। पार्टीको जिम्मेवारीमा पुगेपछि केवल औपचारिकतामा सीमित नभई जनताका दैनिक जीवन र विकासका मुद्दामा प्रत्यक्ष परिणाम देखिने गरी काम गर्नुपर्नेमा उनले जोड दिए।

महामन्त्री पौडेलले स्थानीय तहका स्वास्थ्य केन्द्रहरूमा सामान्य औषधिसमेत नपाउने अवस्थाको अन्त्य गर्न, विद्यालयहरूको शैक्षिक गुणस्तर सुधार्न तथा विद्यार्थी सङ्ख्या बढाउन विशेष लक्ष्यसहित काम गर्नुपर्ने बताए। उदाहरण दिँदै उनले कुनै विद्यालयमा दुई सय विद्यार्थी भए चार वर्षभित्र पाँच सय पुर्‍याउने गरी शैक्षिक सुधार गर्न आग्रह गरे।

साथै, सार्वजनिक सम्पत्तिको संरक्षण गर्ने, अन्यायमा परेका नागरिकलाई न्याय दिलाउने र आन्तरिक विवादभन्दा पनि जनजीविका तथा नागरिकका समस्या समाधानलाई प्राथमिकतामा राख्न उनले पार्टी पङ्क्तिको ध्यानाकर्षण गराए।

कार्यक्रममा कांग्रेसका केन्द्रीय सदस्यहरू डा. जगदीशचन्द्र पोखरेल, दीपक भट्टराई, चिनु पोखरेल र पुरुषोत्तम खनाल लगायतले पार्टीमा युवा सहभागिता बढेको बताउँदै गुट–उपगुट त्यागेर एकताबद्ध भई सङ्गठन बलियो बनाउनुपर्ने विचार व्यक्त गरे।

त्यस्तै, तनहुँ क्षेत्र नम्बर १ का सभापति आनन्दराज त्रिपाठीले नवनिर्वाचित पदाधिकारीहरूलाई पदको जिम्मेवारी इमानदारीपूर्वक पूरा गर्दै जनताको सेवामा खटिन आग्रह गरे। सोही कार्यक्रमबिच नवनिर्वाचित पदाधिकारी तथा सदस्यहरूको औपचारिक पदस्थापनसमेत गरिएको थियो।