पश्चिमी वायुको प्रभाव : देशका विभिन्न स्थानमा वर्षा र हिमपातको सम्भावना, मौसम पूर्वानुमान महाशाखाद्वारा सतर्कता अपनाउन आग्रह

काठमाडौँ, कात्तिक ९ गते । नेपाल मौसम विज्ञान विभाग, मौसम पूर्वानुमान महाशाखाले आगामी पाँच दिनको मौसमी अवस्थाको पूर्वानुमान गर्दै देशमा पश्चिमी वायुको आंशिक प्रभाव रहेको जनाएको छ।

विभागका मौसमविद् रोजन लामिछानेका अनुसार आजदेखि नै देशका केही भागमा आंशिक बदली हुने र बुधबारदेखि वर्षा तथा हिमपातको सम्भावना रहेको छ। आगामी शुक्रबारसम्म देशका विभिन्न भूभागमा मौसममा बदली भई हिमाली तथा पहाडी क्षेत्रमा वर्षा र हिमपात हुन सक्ने महाशाखाले स्पष्ट पारेको छ।

आज राति कोशी, बागमती, गण्डकी र लुम्बिनी प्रदेशका हिमाली तथा पहाडी भूभागमा आंशिक बदली रहने भए पनि अन्य भूभागमा मौसम मुख्यतया सफा रहनेछ। यस्तै, मङ्गलबार कोशी, मधेस, बागमती र गण्डकीका साथै कर्णाली र सुदूरपश्चिम प्रदेशका हिमाली भूभागमा आंशिक बदली रही कोशी, बागमती र गण्डकी प्रदेशका हिमाली भूभागका एक–दुई स्थानमा हल्का वर्षा तथा हिमपातको सम्भावना रहेको छ।

बुधबारदेखि शुक्रबारसम्म मौसममा थप फेरबदल आउने देखिएको छ। विशेष गरी बुधबार कोशी, बागमती, गण्डकी र लुम्बिनी प्रदेशका हिमाली तथा पहाडी भूभागका केही स्थानमा हल्का वर्षा तथा हिमपात हुन सक्नेछ भने बिहीबार र शुक्रबार पनि यो क्रम जारी रहन सक्नेछ।

यस किसिमको मौसम परिवर्तनले दैनिक जनजीवन, पर्यटन, पर्वतारोहण तथा सडक र हवाई यातायातमा असर पर्न सक्ने भएकाले मौसमको अद्यावधिक सूचना लिएर आवश्यक सतर्कता अपनाउन महाशाखाले सबैलाई अनुरोध गरेको छ।