जलवायु परिवर्तनसँग जुध्न नेपालका ३ परियोजनालाई अन्तर्राष्ट्रिय कोषको स्वीकृति!

काठमाडौँ, कात्तिक ८ गते । जलवायु परिवर्तनका कारण उत्पन्न विपद् न्यूनीकरण तथा अनुकूलन क्षमता अभिवृद्धिका लागि नेपालले अघि सारेका तीन वटा महत्त्वाकांक्षी परियोजनाहरूलाई अनुकूलन कोष (Adaptation Fund) ले स्वीकृति प्रदान गरेको छ।

कृषि, वन तथा वातावरणमन्त्री गीता चौधरीले यसलाई नेपालको जलवायु अनुकूलन प्रयासमा एक ऐतिहासिक तथा महत्त्वपूर्ण उपलब्धिको रूपमा लिइएको बताएकी छिन्। यी परियोजनाहरूले नेपालमा वातावरण संरक्षण, जलवायुजन्य जोखिमको सामना र समुदायको उत्थानशीलता बढाउन प्रत्यक्ष टेवा पुर्याउने अपेक्षा गरिएको छ।

स्वीकृत भएका तीन परियोजनामध्ये कोशी क्षेत्रको पारिस्थितिक प्रणाली संरक्षण र प्रकृतिमा आधारित समाधान प्रवर्द्धन गर्ने उद्देश्यसहितको ‘ग्रीन कोशी’ परियोजनाका लागि ९९ लाख अमेरिकी डलर प्रस्ताव गरिएको छ, जुन राष्ट्रिय प्रकृति संरक्षण कोषद्वारा कार्यान्वयन हुनेछ।

त्यस्तै, हिन्दुकुश हिमालय क्षेत्रमा बाढी तथा पहिरोको पूर्वसूचना प्रणाली र अनुकूलन क्षमता सुदृढ गर्न ३ करोड अमेरिकी डलर प्रस्ताव गरिएको छ, जसको कार्यान्वयन ICIMOD ले गर्नेछ। यसले विपद् जोखिम घटाउन र समयमै सूचना प्रवाह गर्न विशेष भूमिका खेल्नेछ।

त्यसैगरी, लुम्बिनी प्रदेशमा स्थानीय नेतृत्व र प्रकृतिमा आधारित जलवायु समाधानमार्फत समुदायलाई उत्थानशील बनाउने तेस्रो परियोजनाका लागि ४९ लाख अमेरिकी डलर प्रस्ताव गरिएको छ। UN-Habitat ले कार्यान्वयन गर्ने यस परियोजनाले स्थानीय तहमा जलवायु परिवर्तनसँग जुध्ने क्षमता अभिवृद्धि गर्नेछ।

यी तीनै परियोजनाको कुल सहयोग रकमले नेपालको जलवायु अनुकूलन र विपद् व्यवस्थापनका प्रयासलाई थप बलियो बनाउने विश्वास लिइएको छ।