अन्नपूर्ण आधार शिविर र मौरिस हर्जोग पदमार्गमा पर्यटकको चहलपहल बढ्यो

म्याग्दी, कात्तिक ७ गते । दसैँ विदाको अवसरमा म्याग्दीको अन्नपूर्ण गाउँपालिका–४ नारच्याङस्थित आठ हजार ९१ मिटर अग्लो अन्नपूर्ण प्रथम हिमालको उत्तरी आधार शिविर र मौरिस हर्जोग पदमार्गमा पर्यटकको चहलपहल तीव्र रूपमा सुरु भएको छ।

असोज दोस्रो साताको अविरल वर्षा र बाढीपहिरोका कारण केही समय सुनसान बनेको यस पर्यटकीय क्षेत्रमा दसैँ सुरु भएलगत्तै पर्यटकहरूको आगमन बढेको हो। दसैँको दिन करिब एक सय जना आन्तरिक पर्यटक हुमखोला हुँदै आधार शिविरतर्फ लागेका थिए भने शुक्रबार यो संख्या बढेर पाँच सयभन्दा माथि पुगेको स्थानीय पर्यटनकर्मी तथा पदमार्गका अभियन्ता तेज गुरुङले जानकारी दिएका छन्।

समुद्री सतहदेखि चार हजार ५० मिटरको उचाइमा अवस्थित यो आधार शिविर पछिल्लो समय नयाँ र आकर्षक गन्तव्यका रूपमा विकास हुँदै गएको छ। म्याग्दी, बागलुङ, पर्वत, पोखरा, काठमाडौँ र चितवन लगायतका विभिन्न जिल्लाबाट पर्यटकहरू यहाँ पुगिरहेका छन्।

पर्यटकहरूको सहजताका लागि हुमखोलादेखि आधार शिविरसम्मका विभिन्न स्थानमा अस्थायी चिया पसल, होटल तथा आश्रयस्थलहरूको सञ्चालन गरिनुका साथै खानेपानी, शौचालय र झोलुङ्गे पुल लगायतका पूर्वाधारहरूको मर्मत-सम्भार गरिएको छ।

नारच्याङको दोभान–छोटेपा हुँदै हुमखोलासम्म २० किलोमिटर सवारी साधन र त्यसपछि करिब २१ किलोमिटरको पैदलमार्ग तय गरेर दुई दिनमा आधार शिविर पुग्न सकिन्छ। पदमार्गमा पर्ने फुतफुते झरना, पञ्चकुण्ड ताल, पहिलो आरोही मौरिस हर्जोग लगायतका व्यक्तिको सालिक तथा खुला सङ्ग्रहालयले पर्यटकहरूको यात्रालाई थप रोमाञ्चक बनाएको छ।

दसैँ–तिहारको यो लामो विदामा पर्यटकको संख्या अझै बढ्ने अपेक्षा गरिएको छ।