चितवन राष्ट्रिय निकुञ्जमा जिप सफारी पुनः सञ्चालन

चितवन, असोज २६ गते । वर्षायाम सुरु भएपछि गत असार १७ गतेदेखि बन्द गरिएको चितवन राष्ट्रिय निकुञ्जभित्रको जिप सफारी औपचारिक रूपमा पुनः सञ्चालनमा आएको छ। बाढीले क्षति पुर्‍याएका निकुञ्जभित्रका सडक तथा रुटहरूको मर्मतकार्य सम्पन्न भएपछि असोज २३ गतेदेखि जिप सफारी पुनः सुचारु गरिएको हो।

सूचना अधिकारी अविनाश थापा मगरका अनुसार गत असोजको दोस्रो साता आएको बाढीले जङ्गल सफारी गर्ने मार्गहरूमा क्षति पुर्‍याएको थियो। बाटो मर्मत, ढलेका रूखहरू पन्छाउने र झाडी सफा गर्नेलगायतका सम्पूर्ण काम सकिएसँगै निकुञ्जले सफारी खुला गरेको छ। निकुञ्जभित्र जिप सफारी बन्द रहेको अवधिमा पनि मध्यवर्ती क्षेत्र तथा सामुदायिक वनहरूमा भने सफारी सुचारु नै रहेको थियो।

सौराहा, कसरा, मेघौली, अमलटारी र माडी क्षेत्रबाट अनुमति प्राप्त चल्ने दर्जनाैँ जिपमार्फत पर्यटकहरूले निकुञ्जको अवलोकन गर्दै आएका छन्। यस सफारीमार्फत पर्यटकहरूले मुख्य रूपमा दुर्लभ एकसिङ्गे गैँडा, पाटेबाघ लगायतका वन्यजन्तुलाई सहज रूपमा अवलोकन गर्न सक्नेछन्।

चाडपर्वको समयमा चितवन घुम्न आउने आन्तरिक तथा बाह्य पर्यटकहरूको सङ्ख्या बढ्ने हुँदा जिप सफारीको सुचारुले पर्यटन व्यवसायमा सकारात्मक ऊर्जा थपेको छ।