बढ्यो कञ्चनजङ्घा क्षेत्रमा पर्यटकको आगमन : पर्यटन व्यवसायी उत्साहित

ताप्लेजुङ, असोज २७ गते । विश्वको तेस्रो अग्लो हिमाल कञ्चनजङ्घा क्षेत्रमा पर्यटकको आवागमन बढ्न थालेको छ। भदौको तेस्रो सातादेखि सुरु भएको यस वर्षको पर्यटकीय याममा आन्तरिक तथा बाह्य पर्यटकहरूको चहलपहल उल्लेख रूपमा वृद्धि भएको छ।

कञ्चनजङ्घा संरक्षण क्षेत्र व्यवस्थापन परिषद्को घुन्सास्थित पर्यटन जाँच चौकीका अनुसार यस याममा हालसम्म १७० जना विदेशी पर्यटकहरू कञ्चनजङ्घा क्षेत्र पुगेका छन्। फ्रान्स, अस्ट्रेलिया, जर्मनी र अमेरिका लगायतका देशहरूबाट पर्यटकहरू भ्रमणका लागि आएका छन्। यस क्षेत्रमा चैतदेखि जेठ र भदौदेखि मङ्सिर गरी वर्षमा दुईवटा मुख्य पर्यटकीय याम हुने गर्दछन्।

दसैँ तथा तिहारको चाडपर्वको समयमा आन्तरिक पर्यटकहरूको चाप अझ बढ्ने गरेको छ। पर्यटकको आगमन बढेसँगै होटल, रेस्टुरेन्ट, पदयात्रा मार्गदर्शक (गाइड), भरिया तथा स्थानीय यातायात व्यवसायीहरूमा उत्साह छाएको छ। लामो समय पदयात्रामा रहने विदेशी पर्यटकका कारण स्थानीयस्तरमा रोजगारी र आम्दानीका अवसरहरू सिर्जना भएका छन्।