साउदी अरबमा ड्रोन आक्रमणबाट नेपालीको मृत्यु भएको घटनाप्रति कांग्रेसद्वारा दुःख व्यक्त

काठमाडौँ, कात्तिक ६ गते । नेपाली कांग्रेसले साउदी अरबमा हालै भएको ड्रोन आक्रमणका क्रममा एक नेपाली नागरिकको मृत्यु भएको घटनाप्रति गहिरो दुःख व्यक्त गरेको छ। निर्दोष नागरिकलाई निशाना बनाएर घटाइने यस्ता हिंसात्मक गतिविधिले मानवता र मानवीय मूल्य मान्यतामाथि गम्भीर प्रहार गरेको ठहर पार्टीले गरेको छ।

कांग्रेस पार्टीका कार्यवाहक मुख्यसचिव कृष्णप्रसाद दुलालद्वारा जारी विज्ञप्तिमा यस अमानवीय घटनाको कडा शब्दमा भर्त्सना गरिएको छ। सभापति गगनकुमार थापाले मृत आत्माको चिरशान्तिको कामना गर्दै शोक सन्तप्त परिवारजनप्रति गहिरो समवेदना तथा श्रद्धाञ्जली अर्पण गर्नुभएको छ।

विज्ञप्तिमा भनिएको छ, विदेशमा रहेका नेपालीहरूको सुरक्षाको विषय अत्यन्तै संवेदनशील भएकाले सरकारले यसमा तत्काल ठोस कदम चाल्नुपर्छ। कांग्रेसले नेपाल सरकारसँग मृतक नेपाली नागरिकको पार्थिव शरीर शीघ्र स्वदेश फर्काउने व्यवस्था मिलाउन र घाइते तथा कार्यरत अन्य नेपालीहरूको सुरक्षाको पूर्ण प्रत्याभूति गराउन जोडदार माग गरेको छ।

खाडी मुलुकहरूमा बढ्दो सुरक्षा चुनौतीका बीच विदेशमा रहेका नेपाली मजदुर तथा कर्मचारीहरूको सुरक्षाका लागि कूटनीतिक पहल तीव्र पार्न पनि कांग्रेसले सरकारको गम्भीर ध्यानाकर्षण गराएको छ। नेपालीहरूको जीवनरक्षा र सुरक्षाका लागि सरकारले समयमै विशेष रणनीति अपनाउनुपर्नेमा पार्टीले जोड दिएको छ।