नेपालमा भारतविरोधी भावनासँग जोडिएको राष्ट्रवादको युग सकियो : अर्थमन्त्री वाग्ले

काठमाडौँ, कात्तिक ६ गते । अर्थमन्त्री डा. स्वर्णिम वाग्लेले नेपालमा भारतविरोधी भावनासँग जोडिएको राष्ट्रवादको युग अब समाप्त भएको बताएका छन्।

शुक्रबार नयाँदिल्लीमा आयोजित ‘एनडीटीभी वर्ल्ड समिट २०२६’ मा बोल्दै उनले नेपाल र भारतबीचको सम्बन्ध भौगोलिक निकटतामा मात्र सीमित नरही अति गहिरो सांस्कृतिक र ऐतिहासिक आधारमा जोडिएको प्रष्ट पारे। एनडीटीभीकी पत्रकार पद्मजा जोशीसँगको कुराकानीका क्रममा उनले नेपालको नयाँ नेतृत्वले भारतसँगको सम्बन्धलाई थप सुदृढ र नयाँ उचाइमा पुर्‍याउन चाहेको उल्लेख गरे।

सोही क्रममा अर्थमन्त्री वाग्लेले प्रधानमन्त्री वालेन्द्र शाह २०२६ को अन्त्यसम्ममा (नोभेम्बरको अन्त्यतिर) भारत भ्रमणमा जान सक्ने संकेतसमेत गरेका छन्। नेपालको राष्ट्रिय हित भारतको आर्थिक प्रगतिसँग निकट रूपमा जोडिएको बताउँदै उनले व्यापार, ऊर्जा र आर्थिक सहकार्यलाई अझ सुदृढ बनाउनुुपर्नेमा जोड दिए। साथै, सन् २०१५ को भूकम्प र हालैको बाढीजस्ता प्राकृतिक विपद्का बेला भारतले पुर्‍याएको तत्परता र सहयोगको उनले उच्च प्रशंसा गरे।

भारतको ‘विकसित भारत २०४७’ को लक्ष्यको प्रशंसा गर्दै वाग्लेले नेपाल भारतको आर्थिक विस्तारबाट पूर्ण रूपमा लाभ लिन चाहने बताए। कूटनीतिक संवादका साथै आर्थिक सहकार्यलाई बलियो बनाउँदै भारतीय पर्यटकहरूलाई नेपालका पर्यटकीय गन्तव्यहरूमा आकर्षित गर्न सकिने उनको भनाइ थियो।

‘अ वर्ल्ड बिटविन अर्डर्स’ विषयवस्तुमा आयोजित उक्त सम्मेलनमा विभिन्न देशका नीतिनिर्माता, अर्थशास्त्री तथा विशिष्ट व्यक्तित्वहरूको सहभागिता रहेको छ।