अन्नपूर्ण पदमार्गमा पर्यटकको आकर्षण: भित्रिए एकै दिनमा १८ सयभन्दा बढी पदयात्री

मनाङ, असोज २६ गते । अन्नपूर्ण संरक्षण क्षेत्र आयोजना (एक्याप) अन्तर्गतका पदमार्गहरूमा पदयात्री पर्यटकको आवागमन उत्साहजनक रूपमा बढेको छ। अनुकूल मौसम र सुरक्षित पदमार्गका कारण दैनिक रूपमा उल्लेख्य संख्यामा आन्तरिक तथा बाह्य पर्यटकहरू यस क्षेत्रमा पुगिरहेका छन्।

एक्यापले सार्वजनिक गरेको पछिल्लो विवरण अनुसार गत असोज २५ गते आइतबार मात्रै एक हजार ८३६ जना पदयात्री विभिन्न प्रवेश नाकाहरूबाट चेक–इन गर्दै अन्नपूर्ण क्षेत्र भित्रिएका छन्। सोही दिन विभिन्न चेक–आउट नाकाहरूबाट आठ सय १५ जना पदयात्रीले सफलतापूर्वक पदयात्रा सम्पन्न गरी बाहिरिएका छन्।

विभिन्न प्रवेश नाकाहरूमध्ये सबैभन्दा धेरै बिरेठाँटी नाकाबाट ५४४ जना पदयात्री भित्रिएका छन्। यसैगरी धारापानीबाट २६० र छोमरोङबाट २४६ जना पर्यटक भित्रिएका छन्। एकै दिनमा १८ सयभन्दा बढी पर्यटक भित्रिनुले अन्नपूर्ण चक्रीय पदमार्ग पर्यटकका लागि पूर्ण रूपमा सुरक्षित, व्यवस्थित र खुला रहेको स्पष्ट पारेको छ।