दसैँका नाममा बजारमा ‘सेल’को चटारो: किनमेल गर्नेको भीडमा ठगीको जोखीम !

काठमाडौँ, असोज २७ गते । दसैँ लागेसँगै काठमाडौँ उपत्यकाका मुख्य बजारहरूमा किनमेल गर्नेहरूको चहलपहल र भीडभाड अत्यधिक बढेको छ। असन, नयाँ सडक, इन्द्रचोक, रन्जना गल्ली, महाबौद्ध र विशाल बजार लगायतका क्षेत्रहरूमा नयाँ लत्ता-कपडा तथा घरायसी सामान किन्न आउने उपभोक्ताहरूको अत्यधिक ठूलो घुइँचो लागेको छ।

पसलभन्दा पनि बाहिर खुला रूपमा ‘सेल’ राखिएका स्थानहरूमा ग्राहकहरूको अत्यधिक आकर्षण देखिने गरेको छ। सस्तो मूल्यमा सामान पाइने र बार्गेनिङ गर्न नपर्ने भएकाले हिँड्दा-हिँड्दै सजिलै छानेर किन्न पाइने ठाउँमा मानिसहरूको भीड लाग्ने गरेको छ।

चाडपर्वको समयमा सस्तो मूल्यमा सामान पाउने आशामा सेल राखिएका ठाउँमा पुग्ने उपभोक्ताहरूले गुणस्तरमा विशेष ध्यान दिनुपर्ने उपभोक्ताकर्मीहरूको सुझाव छ। राम्रा ब्रान्डका सामानमा पुराना, साइज बिग्रिएका वा नबिकेका थोत्रा सामान मिसाएर ‘स्टक क्लियरेन्स’ का नाममा ठगी हुने सम्भावना उच्च हुने गरेको उपभोक्ताहरूको अनुभव रहेको छ।

दसैँको मुखमा आफ्ना परिवारका लागि नयाँ सामान किन्ने क्रममा भीडभाडको फाइदा उठाई केही व्यापारीहरूले सोझा-सादा उपभोक्ताहरूलाई ठगिरहेकाले किनमेल गर्दा विशेष सचेतना अपनाउन आवश्यक छ।