क्रिकेट

काठमाडौँ, भदौ ३० गते । विश्व क्रिकेटका चर्चित ब्याटर तथा अस्ट्रेलियाका पूर्व अन्तर्राष्ट्रिय क्रिकेटर डेभिड वार्नरले नेपाल प्रिमियर लिग (एनपिएल) को तेस्रो सिजनमा काठमान्डु गोर्खाजबाट खेल्ने भएका छन्।काठमान्डु गोर्खाजका अनुसार ३९ वर्षीय वार्नर दशैंपछि नेपाल आउनेछन्। एनपिएल खेल्न आउने विदेशी खेलाडीमध्ये वार्नर अहिलेसम्मकै चर्चित अन्तर्राष्ट्रिय नाममध्ये एक हुन्। उनको आगमनले नेपाली क्रिकेटप्रेमीमाझ एनपिएलप्रतिको आकर्षण थप बढाउने अपेक्षा गरिएको छ।अस्ट्रेलियाले सन् २०१५ र २०२३ मा एकदिवसीय विश्वकप तथा २०२१ मा टी–२० विश्वकप जित्दा वार्नर टोलीका महत्वपूर्ण सदस्य थिए। सन् २०२१ को टी–२० विश्वकपमा उनी प्लेयर अफ द सिरिज समेत चुनिएका थिए।काठमान्डु गोर्खाजका कार्यकारी निर्देशक अनुभव स्वाँर सिरोहियाका अनुसार वार्नरलाई टोलीमा ल्याउने प्रक्रिया लामो छलफल र प्रयासपछि सम्भव भएको हो।उहाँले भन्नुभएको छ, “डेभिड वार्नरलाई एकै रातको प्रयासमा ल्याइएको होइन। यसका लागि महिनौँसम्म छलफल भएका थिए। उहाँस्तरको खेलाडीले काठमाडौँको प्रतिनिधित्व गर्ने र त्रिवि मैदानमा खेल्ने सम्भावनाका लागि हरेक प्रयास गर्‍यौँ।”झन्डै १९ हजार अन्तर्राष्ट्रिय रनवार्नरले अस्ट्रेलियाका लागि ११२ टेस्ट, १६१ एकदिवसीय अन्तर्राष्ट्रिय र ११० टी–२० अन्तर्राष्ट्रिय खेल खेलेका छन्। उनले अन्तर्राष्ट्रिय क्रिकेटमा ४९ शतकसहित झन्डै १९ हजार रन बनाएका छन्।उनको नाममा टेस्ट क्रिकेटमा ८,७८६ रन र एकदिवसीय अन्तर्राष्ट्रियमा ६,९३२ रन छन्। अस्ट्रेलियाका लागि उनको पछिल्लो अन्तर्राष्ट्रिय सहभागिता सन् २०२४ मा अमेरिका र वेस्ट इन्डिजमा आयोजित टी–२० विश्वकपमा भएको थियो।टेस्ट क्रिकेटमा वार्नरको उच्च स्कोर अविजित ३३५ रन हो। उनले सन् २०१९ मा एडिलेडमा पाकिस्तानविरुद्ध उक्त पारी खेलेका थिए। यो अस्ट्रेलियाका लागि टेस्ट क्रिकेटमा दोस्रो उच्च व्यक्तिगत स्कोरमध्ये एक हो।सबैखाले टी–२० क्रिकेटमा वार्नरले ४३९ खेलमा १४ हजारभन्दा बढी रन बनाइसकेका छन्। उनको टी–२० करियरमा १४० भन्दा माथिको स्ट्राइक रेट रहेको छ।आईपीएलमा पनि प्रभावशाली करियरवार्नरले इन्डियन प्रिमियर लिग (आईपीएल) मा पनि लामो र सफल करियर बनाएका छन्। उनले सन् २००९ देखि २०१३ सम्म तत्कालीन दिल्ली डेयरडेभिल्सबाट खेले।सन् २०१४ मा सनराइजर्स हैदराबादमा आबद्ध भएका वार्नर अर्को वर्ष टोलीको कप्तान बने। उनको कप्तानीमा सनराइजर्स हैदराबादले सन् २०१६ मा आईपीएल उपाधि जितेको थियो।वार्नर सन् २०१५, २०१७ र २०१९ मा आईपीएलका सर्वाधिक रन बनाउने खेलाडी बनेका थिए। उनले सनराइजर्स हैदराबादबाट सन् २०२१ सम्म खेलेपछि सन् २०२२ मा पुनः दिल्ली क्यापिटल्समा फर्किएका थिए।काठमान्डु गोर्खाजमा विदेशी खेलाडीको आकर्षणकाठमान्डु गोर्खाजले वार्नरअघि नै श्रीलंकाका अलराउन्डर सहन अराचचिगे र भारतका पूर्व विकेटकिपर केएस भरतलाई टोलीमा अनुबन्ध गरिसकेको छ।वार्नरको आगमनसँगै काठमान्डु गोर्खाजको टोलीमा अन्तर्राष्ट्रिय अनुभव र स्टार आकर्षण थपिएको छ। एनपिएलको तेस्रो सिजनमा वार्नरलाई त्रिवि क्रिकेट मैदानमा नेपाली समर्थकमाझ प्रत्यक्ष खेलिरहेको हेर्न पाइनेछ।