कृष्णभिरमा ट्र्याक निर्माण सम्पन्न, असोज १ गतेदेखि दुईतर्फी यातायात सञ्चालन हुने

काठमाडौँ, भदौ ३१ गते । पृथ्वी राजमार्ग अन्तर्गत नागढुङ्गा–मुग्लिङ सडकखण्डको कृष्णभिरमा अवरुद्ध बनेको सडकको नयाँ ट्र्याक खोल्ने काम तोकिएकै समयमा सम्पन्न भएको छ।

भदौ १० र १४ गतेको बाढीले सडकको सुरक्षा पर्खाल भत्काएपछि अवरुद्ध बनेको सो खण्डमा प्रधानमन्त्री वालेन्द्र शाहले भदौ महिनाभित्रै सञ्चालनमा ल्याउने घोषणा गर्नुभएको थियो। सोही घोषणा अनुसार पूर्वाधार विकास मन्त्रालय र सडक विभागको तीव्र पहलमा ट्र्याक निर्माण सम्पन्न भएको हो।

पूर्वाधार विकास मन्त्री सुनील लम्सालको प्रत्यक्ष निगरानी र ५० जना प्राविधिक टोलीको निरन्तर खटाइबाट पहाड खनेर नयाँ दुई लेनको सडक तयार पारिएको छ। भदौ २८ गतेदेखि नै परीक्षणका रूपमा अत्यावश्यक सवारीसाधन सञ्चालन भइरहेकोमा बुधबारसम्म ग्राभेलको काम सकेर आउँदो असोज १ गते बिहीबारदेखि दुईतर्फी रूपमै यातायात सेवा सञ्चालनमा ल्याइने भएको छ।

यसैबिच, भोटेकोशी बाढीका कारण त्रिशूली–मुग्लिङ कोरिडोरमा क्षतिग्रस्त भएका झोलुङ्गे पुलहरूको मर्मत तथा पुनर्निर्माण कार्यलाई पनि सरकारले तीव्र बनाएको छ। मर्मतसम्भार सम्भव भएका १२ वटा झोलुङ्गे पुलहरू असोज २० गतेभित्र पुनः सञ्चालनमा ल्याउने लक्ष्यका साथ काम भइरहेको छ भने थप ८ वटा पुलको प्राविधिक तयारी अघि बढाइएको छ।

त्यस्तै, पूर्ण रूपमा क्षति भई मर्मत गर्न नमिल्ने अवस्थामा पुगेका अन्य ३३ वटा झोलुङ्गे पुलको पुनर्निर्माणका लागि सरकारले बोलपत्र (टेन्डर) आह्वान गरिसकेको छ। अत्यावश्यक सामग्री खरिद तथा आपूर्ति प्रक्रिया तीव्र पार्दै प्रभावित क्षेत्रको जनजीवन सहज बनाउन सरकार निरन्तर क्रियाशील रहेको प्रधानमन्त्रीको सचिवालयले जनाएको छ।

सडक निर्माण तथा झोलुङ्गे पुल मर्मतको मुख्य विवरण: