11/18/2026, 00:34:32
मङ्गलबार, मङि्सर ०२, २०८३

आन्तरिक राजस्व विभागद्वारा उत्कृष्ट करदाताहरू सम्मानित : निकायतर्फ सूर्य नेपाल र व्यक्तिगततर्फ राजबहादुर शाह सर्वोत्कृष्ट

राष्ट्रिय कर दिवस तथा कर सप्ताह, २०८३ को अवसरमा आन्तरिक राजस्व विभागले विभिन्न विधामा सबैभन्दा बढी कर तिर्ने करदाताहरूलाई सम्मान गरेको छ, जसमा सूर्य नेपाल प्रालि र राजबहादुर शाह अग्रस्थानमा रहेका छन्।


काठमाडौँ, मङ्सिर १ गते । राष्ट्रिय कर दिवस तथा कर सप्ताहका अवसरमा आन्तरिक राजस्व विभागले आर्थिक वर्ष २०८१/८२ मा विभिन्न विधामा मुलुकभरबाट सबैभन्दा बढी कर दाखिला गर्ने उत्कृष्ट करदाताहरूलाई भव्य समारोहकाबीच सम्मानित गरेको छ।

विभागले प्रदान गरेको यस सम्मानबाट विभिन्न औद्योगिक, व्यापारिक, वित्तीय तथा सेवाप्रदायक संस्थाका साथै व्यक्तिगत तर्फका करदाताहरू पुरस्कृत भएका छन्।

प्राप्त विवरणअनुसार निकायगत (संस्थागत) तर्फ सूर्य नेपाल प्रालि ले सबैभन्दा बढी कर तिरेर शीर्ष स्थान हासिल गरेको छ भने व्यक्तिगततर्फ राजबहादुर शाह सम्मानित हुनुभएको छ। त्यस्तै, विभिन्न क्षेत्रगत व्यवसायतर्फ पर्यटन व्यवसायबाट सोल्टि होटल लिमिटेड, वस्तु तथा व्यापारतर्फ सीजी इम्पेक्स र ऊर्जामूलक उद्योगतर्फ भोटेकोशी पावर कम्पनी ले उत्कृष्टता हासिल गर्दै सम्मान प्राप्त गरेका छन्।

यसैगरी, वार्षिक ५० करोडभन्दा बढी र १ अर्ब रुपैयाँसम्मको कारोबार गर्ने श्रेणीमा फुड एन्ड वेभरेज टेक्नोलोजी रिसर्च सेन्टर प्रा.लि., रेमिटेन्स तथा मनी ट्रान्सफरतर्फ आईएमई, र २०७७ साउनदेखि २०८३ असार मसान्तसम्मको अवधिमा सबैभन्दा बढी कर दाखिला गर्नेमा हिमालयन डिस्टिलरी लिमिटेड सम्मानित भएका छन्। वार्षिक ५० करोड रुपैयाँसम्म कारोबार गर्नेमा इम्पेरियल सेक्युरिटिज कम्पनी, विशेष उद्योगतर्फ वरुण वेभरेज, र प्रतिकूल व्यापारिक अवस्थामा समेत उत्कृष्ट व्यवसाय गर्ने भाटभटेनी सुपरमार्केट ले यो सम्मान प्राप्त गरेका छन्।

अन्य विभिन्न विधामा एकलौटी फर्मतर्फ थर्ड आई इन्टरनेसनल, वस्तु निर्यातमा डाबर नेपाल, सूचना प्रविधि सेवा निर्यातमा इन्फानाइड सफ्टवेयर सर्भिस नेपाल, कृषि तथा पशुपक्षीजन्य उद्योगमा ओसीबी फुड्स, बैंक, वित्तीय संस्था र बिमातर्फ नबिल बैंक, तथा स्वास्थ्य र शैक्षिक संस्थाहरूको तर्फबाट नोबेल मेडिकल कलेज एन्ड टिचिङ हस्पिटल लाई आन्तरिक राजस्व विभागले सम्मानित गरेको छ।

कर तिर्ने बानीको विकास गर्न र करदाताहरूलाई प्रोत्साहन गर्न सरकारले हरेक वर्ष यो सम्मान प्रदान गर्दै आएको छ।

सम्मानको विधा उत्कृष्ट करदाता / संस्था
निकायतर्फ (सर्वोत्कृष्ट) सूर्य नेपाल प्रा.लि
व्यक्तिगततर्फ (सर्वोत्कृष्ट) राजबहादुर शाह
पर्यटन व्यवसाय सोल्टी होटल लिमिटेड
वस्तु तथा व्यापार सीजी इम्पेक्स
ऊर्जा क्षेत्र भोटेकोशी पावर कम्पनी
बैंक, वित्तीय संस्था र बिमा नबिल बैंक
स्वास्थ्य तथा शिक्षा नोबेल मेडिकल कलेज एन्ड टिचिङ हस्पिटल