बुढीगण्डकी जलविद्युत् आयोजनामा लगानीका लागि युएईसँग प्रस्ताव : गृहमन्त्री गुरुङ र युएईका मन्त्रीबीच आबुधाबीमा भेट

काठमाडौँ, कात्तिक २८ गते । नेपालले राष्ट्रिय गौरवको बुढीगण्डकी जलविद्युत् आयोजनामा वैदेशिक लगानी भित्र्याउने उद्देश्यले संयुक्त अरब इमिरेट्स (युएई) सँग औपचारिक प्रस्ताव गरेको छ।

विश्व प्रहरी शिखर सम्मेलनमा सहभागी हुन युएईको दुबई पुग्नुभएका गृहमन्त्री सुधन गुरुङ र युएईका वैदेशिक व्यापार मन्त्री डा. थानी बिन अहमद अल जेयोदीबीच आबुधाबीमा भएको उच्चस्तरीय शिष्टाचार भेटका क्रममा उक्त प्रस्ताव गरिएको हो।

भेटवार्तामा नेपालतर्फबाट जलविद्युत् क्षेत्र मात्र नभई कृषि तथा सेवा क्षेत्रको विकास र सुरक्षा प्रविधिमा सहकार्य बढाउने विषयमा समेत गहन छलफल भएको गृहमन्त्रीको सचिवालयले जनाएको छ।

दुई देशबीचको द्विपक्षीय व्यापार, आर्थिक साझेदारी र लगानीका विविध आयामहरूका बारेमा सकारात्मक विचारविमर्श भएको छ। विशेष गरी नेपालका ठूला पूर्वाधार र ऊर्जा परियोजनाहरूमा युएईको लगानी आकर्षित गर्ने तथा नेपाली सुरक्षा निकायलाई थप प्रविधिमैत्री र आधुनिक बनाउने विषयमा दुवै पक्षबीच कुराकानी भएको छ।

नेपालतर्फबाट आएका यी प्रस्तावहरूमा आगामी दिनमा औपचारिक रूपमा कागजात तथा प्रस्ताव आदान-प्रदान गरी प्रक्रियालाई अगाडि बढाउने विषयमा युएईका मन्त्री सकारात्मक देखिएका छन्।

गृहमन्त्री गुरुङ गत शुक्रबार दुबईमा आयोजित ‘विश्व प्रहरी शिखर सम्मेलन’ मा भाग लिन नेपाली प्रतिनिधिमण्डलको नेतृत्व गर्दै त्यसतर्फ प्रस्थान गर्नुभएको थियो। यो भेटवार्ताले नेपाल र युएईबीचको आर्थिक तथा सुरक्षासम्बन्धी सम्बन्धलाई थप उचाइमा पुर्‍याउने विश्वास गरिएको छ।

यस प्रकारका अन्तर्राष्ट्रिय सहकार्यले नेपालको ऊर्जा तथा आर्थिक विकासमा महत्त्वपूर्ण टेवा पुग्ने अपेक्षा गरिएको छ।