पार्टी र सरकारबीच कुनै विवाद छैन, आलोचना आन्तरिक लोकतन्त्रको अभ्यास हो : सभापति रवि लामिछाने

काठमाडौँ, कात्तिक २८ गते । राष्ट्रिय स्वतन्त्र पार्टी (रास्वपा) का सभापति रवि लामिछानेले पार्टी र सरकारबीच कुनै पनि प्रकारको विवाद नरहेको स्पष्ट पार्नुभएको छ।

जनकपुरधाममा आयोजित छठ पर्वको शुभकामना आदान-प्रदान कार्यक्रमलाई सम्बोधन गर्दै उहाँले सरकारलाई पार्टीले गर्ने रचनात्मक सुझाव र गरिने आलोचनालाई विवाद वा फुटको सङ्केतका रूपमा बुझ्न नहुने बताउनुभयो। पार्टीभित्र हुने खुला बहस र आलोचनालाई स्वस्थ आन्तरिक लोकतन्त्रको सुन्दर अभ्यासका रूपमा लिनुपर्नेमा जोड दिँदै उहाँले सरकार आफ्ना प्रतिबद्धताहरू पूरा गर्न पूर्ण रूपमा केन्द्रित रहेको प्रष्ट पार्नुभयो।

मधेशका जनतालाई सम्बोधन गर्दै सभापति लामिछानेले यसपटक जनताले परिवर्तनका लागि दिएको अवसरलाई कुनै पनि हालतमा खेर जान नदिने अङ्गीकार गर्नुभयो। यदि मधेशका जनताले यसको सकारात्मक अनुभूति गर्न सकेनन् भने आगामी निर्वाचनमा आफू मत माग्न नआउने घोषणा गर्दै उहाँले जनतालाई झुक्याउने राजनीति आफूलाई कहिल्यै स्वीकार्य नहुने दोहोर्याउनुभयो।

“मधेशले मालिक खोजेको होइन, सेवक खोजेको हो, हामीले फेर्नुपर्ने हाम्रा सांसदको जीवनशैली होइन, मतदाताको जीवन फेर्नुपर्नेछ,” उहाँले भन्नुभयो।

पार्टीभित्र हुन सक्ने अनियमिता र टिकट वितरणको नाममा चलिरहेको ठगी धन्दाबारे सचेत गराउँदै सभापति लामिछानेले उम्मेदवार बनाइदिने प्रलोभन देखाएर केही व्यक्तिहरूले अग्रिम रकम मागिरहेको सूचना पाइएको बताउनुभयो। पार्टीले अहिलेसम्म कसैलाई पनि आधिकारिक टिकट दिने निर्णय नगरेको स्पष्ट पार्दै उहाँले त्यस्ता ठगहरूलाई दिइएको अग्रिम रकम डुब्ने चेतावनी दिनुभयो।

टिकटको प्रलोभन देखाएर रकम असुल्ने जोकोही विरुद्ध पनि नजिकको प्रहरी कार्यालयमा उजुरी दिन र आर्थिक लेनदेनको सूचना दिन उहाँले कार्यकर्ता तथा सर्वसाधारणलाई आग्रह गर्नुभयो।