सञ्चार प्रणालीमा समस्या आएपछि अमेरिकाभरका उडान रोकिए : ९/११ पछिकै सबैभन्दा ठूलो हवाई अवरोध

काठमाडौँ, कात्तिक २८ गते । अमेरिकाको एयर ट्राफिक कन्ट्रोल (एटीसी) को सञ्चार प्रणालीमा अचानक प्राविधिक समस्या देखिएपछि अमेरिकाभरका सम्पूर्ण उडानहरू रोकिएका छन्।

अधिकारीहरूका अनुसार सन् २००१ सेप्टेम्बर ११ (९/११) को विनाशकारी आतंकवादी आक्रमणपछि अमेरिकी हवाई सेवामा यति व्यापक र गम्भीर असर परेको यो पहिलो घटना हो। राष्ट्रिय यातायात सुरक्षा बोर्ड (एनटीएसबी) का पूर्वप्रमुख रोबर्ट एल. समवाल्टले आधुनिक प्रविधिको युगमा समेत हवाई सेवामा यस्तो व्यापक अवरोध आउनु अत्यन्तै आश्चर्यजनक रहेको प्रतिक्रिया दिएका छन्।

प्रणालीमा आएको अचानकको समस्यापछि अमेरिकी विमान अधिकारीहरूले सुरक्षाको कारण देखाउँदै सम्पूर्ण उडानहरू तुरुन्त रोक्न आदेश दिएका थिए। यस ‘असाधारण परिस्थिति‘ का कारण देशका विभिन्न विमानस्थलहरूमा हजारौँ यात्रुहरू बिचल्लीमा परेका छन् भने एयर क्यानडाले पनि अमेरिका र क्यानडाबीचका सबै उडानहरू शुक्रबार साँझसम्मका लागि रद्द गरिएको घोषणा गरेको छ।

घटना लगत्तै उत्पन्न त्रासलाई मध्यनजर गर्दै अमेरिकी गृह सुरक्षा मन्त्री मार्कवेन मुलिन र राष्ट्रपति डोनाल्ड ट्रम्पले देश सुरक्षित रहेको र यसमाथि कुनै किसिमको बाह्य आक्रमण वा साइबर हमला भएको सङ्केत नरहेको स्पष्ट पार्दै सर्वसाधारणलाई आश्वस्त पार्ने प्रयास गरेका छन्। मन्त्री मुलिनले यो घटना अर्को ‘९/११’ नभएको र यसअघि माइक्रोसफ्टको प्रणालीमा देखिएको अवरोधसँग पनि कुनै सम्बन्ध नरहेको दाबी गरेका छन्। राष्ट्रपति ट्रम्पले पनि यो समस्या एआई वा साइबर आक्रमणका कारण नभएको बताएका छन्।

प्रशासनले उडान अवरुद्ध हुँदा अलपत्र परेका यात्रुहरूलाई आवश्यक सहयोग प्रदान गर्न र उनीहरूको पूर्ण सुरक्षा सुनिश्चित गर्न तीव्र गतिमा काम भइरहेको जनाएको छ।