त्रिभुवन विश्वविद्यालयको शैक्षिक गुणस्तर र परीक्षा प्रणाली सुधारबारे मन्त्रालय र त्रिवि पदाधिकारीबीच उच्चस्तरीय छलफल

काठमाडौँ, कात्तिक २७ गते । त्रिभुवन विश्वविद्यालयको शैक्षिक गुणस्तर सुधार्ने, परीक्षा प्रणालीलाई व्यवस्थित गर्ने तथा उच्च शिक्षामा देखिएका चुनौतीहरू समाधान गर्ने उद्देश्यले शिक्षा तथा मन्त्रालय र त्रिविका पदाधिकारीबीच महत्त्वपूर्ण छलफल भएको छ।

सिंहदरबारस्थित मन्त्रालयमा आयोजित यस बैठकमा त्रिविको संस्थागत ब्रान्ड स्थापना, अनुसन्धानमूलक गतिविधिमा प्रोत्साहन, पठनपाठनको प्रभावकारिता वृद्धि र शैक्षिक क्षमताका आधारमा विद्यार्थी कोटा निर्धारण गर्ने विषयहरू मुख्य रूपमा उठाइएका थिए। साथै, नयाँ शैक्षिक कार्यक्रम सञ्चालन तथा सम्बन्धन वितरणलाई पूर्ण रूपमा मापदण्डमा आधारित र व्यवस्थित बनाउनुपर्नेमा जोड दिइएको छ।

छलफलका क्रममा सेमेस्टर प्रणालीको प्रभावी कार्यान्वयनका लागि आवश्यक पाठ्यक्रम निर्माण भइरहेको तथा नीतिगत सुधारसँगै पाठ्यक्रम परिमार्जनको काम पनि तीव्र पारिएको जानकारी गराइएको थियो। बैठकमा त्रिविका उपकुलपति प्रा.डा. भोला थापा, शिक्षामन्त्रीका सल्लाहकार शैलेन्द्र झा, शिक्षाध्यक्ष प्रा.डा. अन्जना सिंह, रजिष्ट्रार सह-प्रा.डा. रविन्द्र शिवाकोटी, मन्त्रालयका सहसचिवद्वय जयराम अधिकारी र श्रीप्रसाद भट्टराई तथा विभिन्न संकायका डिनहरूको सक्रिय सहभागिता रहेको थियो।

उपकुलपति प्रा.डा. थापाले विश्वविद्यालयलाई उत्कृष्टताको केन्द्र (सेन्टर फर एक्सिलेन्स) का रूपमा विकसित गर्न त्रिवि पूर्ण रूपमा प्रतिबद्ध रहेको बताउँदै मन्त्रालयसँगको सहकार्यमा विस्तृत कार्ययोजना तयार गरी अघि बढ्ने दृढता व्यक्त गर्नुभयो।

त्यसैगरी, सल्लाहकार शैलेन्द्र झा र सहसचिव श्रीप्रसाद भट्टराईले विद्युतीय हाजिरी प्रणालीको प्रयोग, सम्बन्धन प्राप्त क्याम्पसहरूमा पूर्वाधार, पुस्तकालय र प्रयोगशालाको अनिवार्य व्यवस्था तथा त्रिविको अतिक्रमित जग्गा फिर्ता ल्याउने विषयलाई उच्च प्राथमिकतामा राख्नुपर्ने औँल्याउनुभयो।

मन्त्रालय र विश्वविद्यालयबीचको यस किसिमको समन्वयले आगामी दिनमा नेपालको उच्च शिक्षा प्रणालीलाई थप गतिशील, गुणस्तरीय र विश्व बजारमा प्रतिस्पर्धी बनाउन महत्त्वपूर्ण भूमिका खेल्ने विश्वास गरिएको छ।