ऐतिहासिक सिन्धुलीगढीको फेरिँदै स्वरूप : युद्ध सङ्ग्रहालय र पूर्वाधार निर्माणले बढ्यो पर्यटकको आकर्षण

सिन्धुलीगढी, कात्तिक २८ गते । ऐतिहासिक तथा सामरिक महत्व बोकेको सिन्धुली जिल्लाको कमलामाई नगरपालिका–३ स्थित सिन्धुलीगढीको स्वरूपमा पछिल्लो समय व्यापक परिवर्तन आएको छ। लामो समयसम्म प्रचार-प्रसारको अभाव र भग्नावशेषको रूपमा ओझेलमा परेको गढीमा युद्ध सङ्ग्रहालय, ऐतिहासिक किल्ला र अन्य अत्याधुनिक पर्यटकीय पूर्वाधारहरू निर्माण भएपछि यो आकर्षक गन्तव्यका रूपमा विकसित हुँदै गएको छ।

१८२४ असोज १५ गते काठमाडौँ कब्जा गर्ने उद्देश्यले आएको क्याप्टेन किनलकको नेतृत्वमा रहेको अङ्ग्रेज फौजलाई गोर्खाली सेनाले यही भूमिमा पराजित गरेको गौरवपूर्ण इतिहास बोकेको यस स्थललाई राष्ट्रिय गौरवको प्रतीकका रूपमा संरक्षण गर्न थालिएको छ।

नगरपालिकाद्वारा बनाइएको गुरुयोजना अनुसार किल्लाहरूको पुनर्निर्माण, वीर योद्धाहरूका प्रतिमा स्थापना तथा नेपाली सेनाद्वारा निर्मित युद्ध सङ्ग्रहालयले यहाँको ऐतिहासिक गरिमालाई थप उजागर गरेका छन्।

बागमती प्रदेश सरकारको सहकार्यमा साढे चार करोड रुपियाँको लागतमा रानीदरबार निर्माण सम्पन्न भएको छ भने रक्ते छाँगो क्षेत्रमा समाधि पार्क बनाउने तयारी भइरहेको छ। यी सम्पूर्ण संरचनाहरूको निर्माणले गढी घुम्न आउने पर्यटकबाट वार्षिक पाँच करोड रुपियाँ आम्दानी गर्ने महत्त्वाकाङ्क्षी लक्ष्य नगरपालिकाले लिएको छ। बिपी राजमार्गसँग जोडिएका कारण पनि यस मार्ग भएर यात्रा गर्ने यात्रुहरूका लागि सिन्धुलीगढी प्रमुख विश्राम र आकर्षणको केन्द्र बनेको छ।

कमलामाई नगरपालिकाका सूचना अधिकारी सागरकुमार ढकालका अनुसार हाल दैनिक चार सयभन्दा बढी पर्यटकहरू युद्ध सङ्ग्रहालय र गढी अवलोकनका लागि आउने गरेका छन्। सङ्ग्रहालयभित्र गढीको ऐतिहासिक महत्त्व झल्काउने वृत्तचित्र (डकुमेन्ट्री) प्रदर्शन गरिनुका साथै गोर्खाली सेनाले प्रयोग गरेका घरेलु हतियार, तोप, गोला, ऐतिहासिक दस्ताबेज र दुवै पक्षका पुराना पोसाकहरू अवलोकन गर्न पाइन्छ।

यहाँ पुग्ने पर्यटकहरू ऐतिहासिक वातारणमा रमाउँदै कम्तीमा डेढ घण्टाभन्दा बढी समय बिताउने गरेको स्थानीय शिक्षकहरू बताउँछन्।

सिन्धुलीगढीको यो ऐतिहासिक पहिचानलाई जोगाउन र प्रवर्द्धन गर्न नेपाल पत्रकार महासङ्घ सिन्धुली शाखाले २०६७ सालदेखि कात्तिक २४ गते विजय उत्सव मनाउन थालेकोमा, स्थानीय तहको निर्वाचनपश्चात् कमलामाई नगरपालिकाले यसलाई निरन्तरता दिँदै आएको छ।