शरद् ऋतुमा हिमाल आरोहणका लागि ७६ देशका १४ सय बढी आरोहीले लिए अनुमति : चक्रवात ‘अर्णव’ का कारण पाँच दिन प्रभावित हुने

काठमाडौँ, कात्तिक १२ गते । यस वर्षको शरद् ऋतुमा हिमाल आरोहणका लागि ७६ देशका एक हजार बढी आरोहीले अनुमति लिएका छन्। पर्यटन विभागका अनुसार ४४ वटा हिमाल आरोहण गर्न १६१ समूहका कुल एक हजार ४१० जना आरोहीले अनुमति लिएका हुन्।

विभागकी आरोहण शाखा प्रमुख निशा थापा राउतका अनुसार अनुमति लिनेहरूमा एक हजार ६९ पुरुष र ३४१ महिला रहेका छन्। यस सिजनमा सबैभन्दा धेरै मनासलु हिमाल आरोहण गर्न ४३ समूहका ५ सय जनाले अनुमति लिएका छन्, जसबाट मात्रै २२ करोड ५८ लाखभन्दा बढी राजस्व सङ्कलन भएको छ।

त्यस्तै, अमादब्लम हिमाल लगायत अन्य हिमालहरूका लागि पनि उल्लेख्य सङ्ख्यामा आरोहीहरूले अनुमति लिएका छन्। देशगत रूपमा हेर्दा सबैभन्दा धेरै चीनबाट १४१, फ्रान्सबाट १३०, अमेरिकाबाट ११९, रसियाबाट १०८ र बेलायतबाट ९६ जना आरोहीले अनुमति लिएका छन्। प्रतिकूल मौसमका कारण मनासलुमा केही कठिनाई देखिए पनि अन्य अधिकांश हिमालहरूमा आरोहण गतिविधि जारी रहेको विभागले जनाएको छ।

तर, बङ्गालको खाडीमा विकसित भएको ‘अर्णव’ चक्रवातको प्रभाव नेपालमा पनि पर्न थालेपछि आगामी पाँच दिनसम्मका लागि हिमाल आरोहण तथा उच्च हिमाली क्षेत्रको पदयात्रा प्रभावित हुने निश्चित भएको छ। विभागले कात्तिक ११ देखि १५ गतेसम्म देशका विभिन्न स्थानमा भारी वर्षा तथा हिमाली क्षेत्रमा भारी हिमपात र हिमपहिरोको उच्च जोखिम रहेको चेतावनी दिएको छ।

सम्भावित जोखिमलाई मध्यनजर गर्दै पर्यटक तथा ट्रेकिङ एजेन्सीहरूलाई उच्च सतर्कता अपनाउन र सुरक्षित स्थानमा रहन आग्रह गरिएको छ। मौसममा सुधार नआएसम्म हिमाली क्षेत्रमा हुने गतिविधिहरू स्थगित वा प्रभावित हुने भएकाले सम्बन्धित सबै पक्षलाई विशेष सावधानी अपनाउन सुझाइएको छ।