काठमाडौँमा प्रहरीको विशेष ‘स्विप अपरेसन’ : सार्वजनिक स्थलमा अशान्ति र गुन्डागर्दी गर्ने ७५ जना पक्राउ

काठमाडौँ, कात्तिक ११ गते । सार्वजनिक स्थलमा हुने दुव्र्यवहार, चोरी, लुटपाट र गुन्डागर्दीजस्ता अवाञ्छित गतिविधिहरू नियन्त्रण गर्ने उद्देश्यले प्रहरीले विशेष सुरक्षा अभियान कडा पारेको छ।

जिल्ला प्रहरी परिसर काठमाडौँले पछिल्लो २४ घण्टाको अवधिमा सञ्चालन गरेको ‘स्विप अपरेसन’ का क्रममा ६० पुरुष, १४ महिला र अन्य एक जना गरी कुल ७५ जनालाई नियन्त्रणमा लिएको हो। सार्वजनिक यातायात, भीडभाडयुक्त क्षेत्र तथा सरकारी एवं सार्वजनिक सेवा प्रवाह हुने कार्यालय आसपासका क्षेत्रहरूलाई लक्षित गर्दै प्रहरीले सुरक्षा व्यवस्था प्रभावकारी बनाउने प्रयास स्वरूप यो अभियान चलाएको जनाएको छ।

जिल्ला प्रहरी परिसर काठमाडौँका प्रवक्ता तथा प्रहरी उपरीक्षक दानबहादुर थापाका अनुसार सार्वजनिक स्थलमा हो-हल्ला गर्ने, हुल-हुज्जत गर्ने, हातपात तथा दुव्र्यवहार गर्ने, चोरी–लुटपाट गर्ने तथा सेवाग्राहीलाई अनावश्यक दुःख दिने बिचौलियाहरूलाई विशेष निगरानीमा राखिएको छ। यस अभियानका दौरान प्रहरीले अदालतबाट दोषी ठहर भई सजाय तोकिएका तथा विभिन्न मुद्दामा फरार रहेका १२ जना (८ जना फरार र ४ जना अन्य सजाय पाएका) व्यक्तिहरूलाई समेत पक्राउ गर्न सफल भएको छ।

प्रहरीको यस प्रकारको कडा निगरानी र छट्नी अभियानले आम नागरिकलाई सार्वजनिक स्थलमा सुरक्षित महसुस गराउन र आपराधिक गतिविधिमा संलग्नहरूलाई कानुनी दायरामा ल्याउन महत्त्वपूर्ण टेवा पुग्ने विश्वास गरिएको छ। पक्राउ परेका सबै जनाविरुद्ध आवश्यक अनुसन्धान तथा कानुनी कारबाही अगाडि बढाइएको प्रहरीले जनाएको छ।