गोलबजार नगरपालिकाका तत्कालीन नगरप्रमुख देवनाथ साहु तेलीसहित ७ जनाविरुद्ध भ्रष्टाचार मुद्दा दायर

काठमाडौँ, कात्तिक १० गते । सिरहाको गोलबजार नगरपालिकाका तत्कालीन नगर प्रमुख देवनाथ साहु तेलीसहित सात जनाविरुद्ध भ्रष्टाचार मुद्दा दायर गरिएको छ।

अख्तियार दुरुपयोग अनुसन्धान आयोगका प्रवक्ता सुरेश न्यौपानेका अनुसार आर्थिक वर्ष २०७७/७८ र २०७८/७९ मा पशु, बाख्रा तथा गुदरी हाटबजारसम्बन्धी ठेक्कामा विवादित व्यक्तिसँग मिलेमतो गरी रकम हिनामिना गरेको र सम्झौता बिना नै आधा राजस्व असुल गरी बाँकी रकम अपचलन गरेको उजुरीको आधारमा अनुसन्धान अघि बढाइएको थियो। अनुसन्धानका क्रममा उनीहरूले आपसी मिलेमतोमा सार्वजनिक सम्पत्तिको हानिनोक्सानी गरी गैरकानुनी लाभ लिएको पुष्टि भएको आयोगले जनाएको छ।

आयोगले तत्कालीन नगरप्रमुख देवनाथ साहु तेली, उपप्रमुख रेशम कुमारी थापा, तत्कालीन प्रमुख प्रशासकीय अधिकृत श्रीधर केसी, राजस्व शाखा प्रमुख दिनेश कुमार सहनी र हाटबजार ठेकेदार वीरेन्द्र कुमार यादवविरुद्ध १ करोड ६० लाख ४६ हजार ३४४ रुपियाँ बिगो माग दाबी गर्दै भ्रष्टाचार मुद्दा दायर गरेको छ।

यसैगरी, अन्य दुई तत्कालीन प्रमुख प्रशासकीय अधिकृतहरू अनन्त कुमार पौड्याल र राम नारायण महतोविरुद्ध भने १ करोड ३३ लाख ११ हजार ४३१ रुपियाँ भ्रष्टाचार मुद्दा दायर गरिएको छ।

भ्रष्टाचार निवारण ऐन, २०५९ बमोजिम कसुर गरेको ठहर गर्दै प्रतिवादीहरूलाई हदैसम्मको सजाय माग दाबीसहित मंगलबार विशेष अदालत, काठमाडौँमा आरोपपत्र दायर गरिएको अख्तियारले जनाएको छ। स्थानीय तहमा हुने यस प्रकारका आर्थिक अनियमितता र भ्रष्टाचारका घटनाले सार्वजनिक वित्त व्यवस्थापनमा चुनौती खडा गरेको छ।