दसैँ सकिएसँगै घट्यो कुखुराको मासुको मूल्य

काठमाडौँ, कात्तिक १० गते । दसैँको बिदा सकिएर बजार सामान्य बन्दै जाँदा उपत्यकामा कुखुराको मासुको मूल्यमा गिरावट आएको छ।

चाडपर्वका बेला काठमाडौँ उपत्यका बाहिर गएका सर्वसाधारणहरू अझै पूर्ण रूपमा फर्किन नसकेका कारण बजारमा मासुको खपत घटेको छ र सोही कारण व्यवसायीहरूले मूल्य घटाएका हुन्। राष्ट्रिय कुखुरा बिक्री व्यवसायी सङ्घले दिएको जानकारीअनुसार सोमबारदेखि लागु हुने गरी जिउँदो कुखुराको मूल्य प्रति किलोग्राम १० रुपियाँ र तयारी मासुको मूल्य १५ रुपियाँले घटाइएको छ।

नयाँ मूल्यसूची अनुसार यसअघि प्रतिकिलो २९० रुपियाँमा कारोबार भइरहेको जिउँदो कुखुराको मूल्य घटेर अब २८० रुपियाँ कायम भएको छ। त्यसैगरी, पसलैपिच्छे फरक मूल्यमा प्रतिकिलो ४२० रुपियाँसम्म बिक्री हुँदै आएको तयारी मासुको मूल्य १५ रुपियाँले घटेर ३८५ रुपियाँमा झरेको छ।

चाडपर्वको समयमा खसी र राँगाको मासु बढी खपत हुने भए पनि सामान्य अवस्थामा भने कुखुराको मासुको माग नै बढी हुने गर्दछ। हाल बजारमा जिउँदो खसी प्रतिकेजी ७५० देखि ८५० रुपियाँ र तयारी खसीको मासु प्रतिकेजी एक हजार सात सय रुपियाँसम्ममा कारोबार भइरहेको छ।

सङ्घका अनुसार आगामी महिनाबाट जाडो मौसम सुरु हुने भएकाले चिसो बढेसँगै उपत्यकामा मासुको खपत पुनः बढ्ने अपेक्षा गरिएको छ। उपत्यका बाहिरका मानिसहरू फर्कने क्रम जारी रहेकाले केही दिनमा बजारले आफ्नो नियमित गति समात्ने र मासुको कारोबार सामान्य बन्ने व्यवसायीहरूको भनाइ छ।