एनपिएलका आगामी संस्करण देशका सबै प्रदेशमा हुने : ८ सहरमा रंगशाला निर्माण प्रक्रिया अघि बढाइयो

काठमाडौँ, कात्तिक ९ गते । नेपाल प्रिमियर लिग (एनपिएल) का आगामी संस्करणहरू देशका सबै प्रदेश तथा प्रमुख सहरहरूमा पुर्याउने उद्देश्यले सरकारले पूर्वाधार विकासको काम अगाडि बढाएको छ।

एनपिएलको तेस्रो संस्करण सुरु हुने दिन सोमबार पूर्वाधार विकासमन्त्री सुनिल लम्सालले आगामी दिनमा एनपिएलका खेलहरू ‘होम एन्ड अवे’ का आधारमा खेलाउने व्यवस्थाका लागि आवश्यक काम थालनी गरिएको जानकारी दिएका छन्। हालसम्म काठमाडौंको त्रिवि अन्तर्राष्ट्रिय क्रिकेट मैदानमा मात्र सीमित रहेको एनपिएललाई देशव्यापी बनाउन यो महत्त्वपूर्ण कदम हुने विश्वास लिइएको छ।

मन्त्री लम्सालका अनुसार ‘होम एन्ड अवे’ का आधारमा खेलहरू सञ्चालन गर्न सकिने गरी देशका प्रमुख आठ सहरहरूमा फ्लडलाइटसहित कम्तीमा आठ हजार दर्शक क्षमताका क्रिकेट रंगशालाहरू निर्माणको प्रक्रिया पूर्वाधार विकास मन्त्रालयले अघि बढाइसकेको छ। आगामी तीन वर्षभित्र निर्माण सम्पन्न गर्ने लक्ष्य लिइएको यस बृहत् योजनाले नेपाली क्रिकेटको विकासमा नयाँ आयाम थप्ने सरकारको अपेक्षा छ।

साथै, मन्त्री लम्सालले नेपाल क्रिकेट संघ (क्यान) लाई पनि सोही अनुरूप आवश्यक आन्तरिक तयारी अघի बढाउन आग्रह गरेका छन्।

आफ्नो शुभकामना सन्देशमा मन्त्री लम्सालले एनपिएलको तेस्रो संस्करणको पूर्ण सफलताको कामनासमेत गरेका छन्। देशका आठवटै फ्रेन्चाइज टिमहरूले आआफ्नो गृह सहरबाट समर्थन पाउने र स्थानीय तहमा समेत खेलकुदको व्यावसायिक विकास हुने अपेक्षा गरिएको यस योजनाले नेपाली क्रिकेटप्रेमीहरूमा थप उत्साह जगाएको छ।