एनपिएलले नेपाली क्रिकेटको उत्साहलाई नयाँ उचाइमा पुर्‍याउँदैछ : मन्त्री सोविता गौतम

काठमाडौँ, कात्तिक ९ गते । कानुन, न्याय तथा संसदीय मामिलामन्त्री सोविता गौतमले नेपाल प्रिमियर लिग (एनपिएल) को तेस्रो संस्करण सुरु हुन लागेको अवसरमा नेपाली क्रिकेटले नयाँ उचाइ लिँदै गरेको बताएकी छिन्।

सोमबारबाट सुरु हुने यस भव्य प्रतियोगिताको सन्दर्भमा आफ्ना धारणा सार्वजनिक गर्दै मन्त्री गौतमले एनपिएल नेपाली प्रतिभा, निजी क्षेत्रको सामर्थ्य र राष्ट्रिय एकताको एक अनुपम संगम बनेको स्पष्ट पारेकी छिन्। यसले देशका विभिन्न कुनाकन्दरामा ओझेलमा परेका प्रतिभाहरूलाई विश्वस्तरीय खेलाडीहरूसँग एउटै मैदानमा खेल्ने सुवर्ण अवसर प्रदान गरेको उनको भनाइ छ।

मन्त्री गौतमले एनपीएलको सफल आयोजनाले निजी क्षेत्रलाई नयाँ अवसर दिनुका साथै खेलकुदलाई राष्ट्रिय उत्सवका रूपमा स्थापित गरेको बताएकी छिन्। सरकारले उचित वातावरण र सहजीकरण गरिदिने हो भने निजी क्षेत्रले सम्भावनालाई उद्योगमा, प्रतिभालाई अवसरमा र खेललाई भव्य उत्सवमा बदल्न सक्छ भन्ने गतिलो उदाहरण एनपिएल बनेको उनले औंल्याइन्। यस्ता प्रतियोगिताहरूले नेपाली क्रिकेटको भविष्य उज्ज्वल बनाउनुका साथै हजारौँ युवाहरूको आत्मविश्वास बढाउन र उनीहरूका सपनालाई नयाँ उडान दिन ठूलो भूमिका खेल्ने उनले विश्वास व्यक्त गरिन्।

प्रतियोगितामा सहभागी हुने सम्पूर्ण टिम, खेलाडी तथा आयोजकहरूलाई शुभकामना दिँदै मन्त्री गौतमले मैदानमा जुनसुकै टिम विजयी भए पनि अन्ततः जित नेपाली क्रिकेटकै हुने बताएकी छिन्। आजबाट त्रिवि अन्तर्राष्ट्रिय क्रिकेट मैदानमा सुरु हुने यस तेस्रो संस्करणको एनपिएललाई लिएर खेलप्रेमी तथा सरकारका तर्फबाट समेत उच्च उत्साह र समर्थन देखिएको छ।