नेपाल–भारत सम्बन्धलाई उत्पादनमूलक र दिगो बनाउनुपर्छ: परराष्ट्रमन्त्री खनाल

काठमाडौं, असोज २९ गते । परराष्ट्रमन्त्री शिशिर खनालले नेपाल–भारत आर्थिक सम्बन्धलाई उत्पादनमूलक, विविधतायुक्त र दिगो बनाउन व्यापार, लगानी, ऊर्जा, डिजिटल प्रविधि तथा पर्यटन क्षेत्रमा सहकार्य विस्तार गर्नुपर्नेमा जोड दिनुभएको छ।

नेपाल–भारत चेम्बर अफ कमर्स एन्ड इन्डस्ट्रीको ३२औँ वार्षिक साधारणसभालाई बिहीबार काठमाडौँमा सम्बोधन गर्दै मन्त्री खनालले द्विपक्षीय सम्बन्धबाट प्राप्त सम्भावनालाई ठोस आर्थिक उपलब्धिमा रूपान्तरण गर्नुपर्ने बताएका हुन्।

कूटनीति अब केवल औपचारिक वार्ता र सन्धिसम्झौतामा मात्र सीमित नभई उद्योग, व्यापार, ऊर्जा र डिजिटल भुक्तानी प्रणालीसमेत आर्थिक कूटनीतिका महत्त्वपूर्ण क्षेत्र बनेको उहाँले उल्लेख गर्नुभयो। भारत नेपालको सबैभन्दा ठुलो व्यापारिक साझेदार तथा वैदेशिक लगानीको प्रमुख स्रोत रहेको बताउँदै उहाँले नेपालको कुल बाह्य वस्तु व्यापारमा भारतको हिस्सा ६० प्रतिशतभन्दा बढी र कुल निर्यातको ८० प्रतिशतभन्दा बढी भारततर्फ हुने जानकारी दिनुभयो।

कार्यक्रममा मन्त्री खनालले व्यापार सहजीकरण, लगानी तथा औद्योगिक साझेदारी, ऊर्जा, डिजिटल रूपान्तरण र पर्यटनलाई नेपाल–भारत आर्थिक सहकार्यका प्रमुख प्राथमिकताका रूपमा अगाडि सार्नुभयो।