फ्लाई दुबईको उडान सन् २०२७ सम्म विस्तार: पोखराका पर्यटन व्यवसायीमा उत्साह र नियमितताको विश्वास

काठमाडौँ, असोज २८ गते । फ्लाई दुबईले यही असोज ७ गतेदेखि सुरु गरेको दुबई–पोखरा–दुबई उडान सेवा नियमित र दिगो हुनेमा यहाँका पर्यटन व्यवसायीहरू ढुक्क रहेको पाइएको छ। सुरुमा छ महिनाका लागि मात्र टिकट बुकिङ खुला गरेको फ्लाई दुबईले सन् २०२७ अक्टोबर ३० सम्मलाई बुकिङ अवधि बढाएपछि व्यवसायीहरूलाई थप विश्वस्त तुल्याएको हो।

फ्लाई नमस्ते ट्राभल्सका सञ्चालक तथा पोखरा पर्यटन परिषद्का पूर्वअध्यक्ष पोमनारायण श्रेष्ठले उडान सुरुआतमै उत्साहजनक रहेको र आगामी वर्षसम्मै बुकिङ खुला भएकाले उडान नियमित सञ्चालन हुने विश्वास बढेको बताउनुभयो। चाडबाडको समय भएकाले हाल दुबईबाट पोखरा आउने यात्रुको सङ्ख्या बढी रहेको र पर्वहरू पश्चात् पोखराबाट दुबई जाने यात्रुको सङ्ख्या बढ्ने अपेक्षा गरिएको छ।

पोखरा अन्तरराष्ट्रिय विमानस्थलका सूचना अधिकारी विनोदसिंह रावतका अनुसार मौसम खराबीका कारण एउटा उडान बाहेक अन्य दिन नियमित रूपमा उडान भइरहेको छ। गत सोमबारसम्ममा यस उडानमार्फत ३,११३ जना यात्रु पोखरा भित्रिएका छन् भने १,४२३ जना दुबईतर्फ प्रस्थान गरेका छन्। कम्पनीले १६५ यात्रु क्षमताको बोइङ ७३७ म्याक्स ८ जहाजमार्फत दैनिक रूपमा साँझ ६:१५ बजे पोखरा अवतरण र ७:१५ बजे दुबई प्रस्थान गर्ने तालिका अनुसार उडान भरिरहेको छ।

पोखरा अन्तरराष्ट्रिय विमानस्थलबाट नियमित अन्तरराष्ट्रिय उडान गर्ने फ्लाई दुबई पहिलो वायुसेवा कम्पनी हो। यस उडानबाट दुबईलाई ट्रान्जिट बनाएर विश्वका धेरै मुलुकसँग पोखराको हवाई सञ्जाल विस्तार भएको छ, जसले पोखराको पर्यटन, व्यवसाय, रोजगारी र समग्र आर्थिक गतिविधिमा दीर्घकालीन टेवा पुग्ने विश्वास लिइएको छ।

सरकारले पनि अन्तरराष्ट्रिय उडानलाई प्रोत्साहन गर्न विसं २०८५ मसान्तसम्म पार्किङ, ल्यान्डिंग र नेभिगेसन शुल्कमा पूर्ण छुट तथा ग्राउन्ड ह्यान्डलिङमा ५० प्रतिशत छुट प्रदान गर्दै आएको छ।