काठमाडौँमा फरक कम्पनीका ग्यास बिक्री-वितरण बन्द: बिहीबारदेखि डिलरबाटै पाइने

काठमाडौँ, असोज २८ गते। काठमाडौं उपत्यकामा गत आइतबारदेखि सुरु गरिएको फरक कम्पनीका ग्यास सिलिन्डर साट्ने र बिक्रीवितरण गर्ने व्यवस्था अब बन्द हुने भएको छ।

नेपाल आयल निगम र नेपाल एलपी ग्यास उद्योग संघको सहकार्यमा उपत्यकाका ११ स्थानबाट सञ्चालित त्यस्ता वितरण केन्द्रहरू बुधबारसम्म मात्रै सञ्चालन हुने र बिहीबारदेखि डिलरहरूमार्फत मात्र नियमित ग्यास बिक्री हुने भएको छ।

वितरण केन्द्रहरूमा उपभोक्ताको अत्यधिक भीड बढेपछि र त्यसलाई नियन्त्रण गर्न नसकिएपछि यस्तो निर्णय गरिएको संघका अध्यक्ष दिवान चन्दले जानकारी दिनुभएकाे छ। दसैँको समयमा डिलरहरूले ग्यास बेच्न नपाएको गुनासो आएको र डिलरमार्फत वितरण गर्दा वास्तविक उपभोक्ता पहिचान गर्न सहज हुने भएकाले पुरानै प्रणालीमा फर्किएको उहाँको भनाइ छ।

नेपाल आयल निगमले भने भारतबाट ग्यास आयातमा कुनै अवरोध नरहेको र बजारमा पर्याप्त मात्रामा ग्यास आइसकेको जनाएको छ। मासिक खपतभन्दा बढी ग्यास आयात भए पनि बजारमा देखिएको खाली सिलिन्डरको अत्यधिक सङ्ख्या र आधा सिलिन्डर बिक्रीको नीतिकै कारण केही समय असहजता देखिएको निगमका प्रवक्ता मनोजकुमार ठाकुरले स्पष्ट पार्नुभएको छ।

यद्यपि, उपभोक्ता अधिकारकर्मीहरूले भने निगमको ढुलमुले नीति र प्रभावकारी व्यवस्थापनको अभावले गर्दा उपभोक्ताले अझै पनि ग्यास पाउन लाइन बस्नुपरेको गुनासो गर्दै आएका छन्। उपत्यकाबाहिर ग्यास आपूर्ति सामान्य भइसकेकाले काठमाडौँमा पनि दसैँसम्ममा अवस्था पूर्ण रूपमा सहज हुने अपेक्षा गरिएको छ।