सरकारी सवारीसाधन दुरुपयोग गरी अभद्र व्यवहार गर्ने सापकोटा पक्राउ

काठमाडौँ, असोज २७ गते । सार्वजनिक बिदाको दिन सरकारी सवारीसाधन दुरुपयोग गर्दै सार्वजनिक स्थानमा सर्वसाधारणसँग अभद्र व्यवहार गरेको आरोपमा एक व्यक्ति पक्राउ परेका छन्। काभ्रेपलाञ्चोकको पनौती नगरपालिका–३ कुशादेवी बस्ने ४० वर्षीय गणेश सापकोटा पक्राउ परेका हुन्।

जिल्ला प्रहरी कार्यालय काभ्रेपलाञ्चोकका सूचना अधिकारी रबिन विष्टका अनुसार सामाजिक सञ्जालमा सार्वजनिक भएको भिडियोका आधारमा सापकोटालाई असोज २५ गते पक्राउ गरिएको हो। उनलाई जिल्ला प्रशासन कार्यालय काभ्रेपलाञ्चोकमा उपस्थित गराएर तीन दिनको म्याद थप अनुमति लिइएको छ।

हाल उनलाई इलाका प्रहरी कार्यालय बनेपाको हिरासतमा राखि अभद्र व्यवहारसम्बन्धी कसुरअन्तर्गत थप अनुसन्धान प्रक्रिया अघि बढाइएको प्रहरीले जनाएको छ।