“अस्पट कानुनलाई स्पष्ट बनाएर विद्यमान समस्या समाधान गर्न लागिपरेका छौँ ।”

चितवन, असोज २६ गते । कानुन, न्याय तथा संसदीय मामिलामन्त्री सोविता गौतमले अस्पष्ट कानुनका कारण उद्योगी–व्यवसायीले भोग्दै आएको प्रशासनिक झन्झट अन्त्य गर्न कानुन संशोधन गरिने बताउनुभएको छ। समयअनुसार कानुनलाई स्पष्ट र व्यावहारिक बनाउँदै लगानीमैत्री वातावरण निर्माणमा सरकार केन्द्रित रहेको उहाँको भनाइ छ।

चितवन उद्योग सङ्घको ३५औँ वार्षिक साधारणसभालाई सम्बोधन गर्दै मन्त्री गौतमले लगानीमैत्री कानुन निर्माणका लागि सरकार आवश्यक पूर्वतयारी र छलफलमा जुटेको जानकारी दिनुभयो। नीति निर्माता, कर्मचारीतन्त्र, निजी क्षेत्र र राजनीतिक क्षेत्रबीच सहकार्य आवश्यक रहेको उहाँले बताउनुभयो।

“प्रशासनिक झन्झट त्यतिबेला आउँछ जतिबेला कानुनहरू अस्पष्ट हुन्छन् । अब अस्पट कानुनलाई स्पष्ट बनाएर विद्यमान समस्या समाधान गर्न लागिपरेका छौँ । अहिलेसम्म तपाईंहरूले भोग्नुभएको समस्या वर्षौंदेखि जेलिँदै आएका समस्या हुन् । सुधारमुखी कुराहरू देखिनका लागि कानुनको संसोधन गर्नुपर्‍यो । संसोधनको चरणमा बल्ल हामी पुगेका छौँ ।”

मन्त्री गौतमका अनुसार कानुन निर्माण र संशोधन रातारात सम्भव हुँदैन। दीर्घकालीन समस्या समाधान हुने गरी पर्याप्त अध्ययन र संवाद आवश्यक रहेको भन्दै उहाँले हतारमा गरिएको कानुन संशोधनको असर जनताले भोग्नुपर्ने भएकाले सरकारले योजनाबद्ध रूपमा प्रक्रिया अघि बढाइरहेको बताउनुभयो।

उहाँले लगानी र उद्योगमैत्री कानुन निर्माणको चरणमा सरकार प्रवेश गरिसकेको बताउँदै स्पष्ट कानुन, कम प्रशासनिक झन्झट र सहज लगानी वातावरणले निजी क्षेत्रको विश्वास बढाउने उल्लेख गर्नुभयो। उद्योगी–व्यवसायीका समस्या समाधान गर्न प्रदेश सरकार पनि प्रतिबद्ध रहेको कार्यक्रममा सहभागी वक्ताहरूले बताएका छन्।