मुस्ताङमा रोकिएका पाँच सयभन्दा बढी कन्टेनर गन्तव्यतर्फ प्रस्थान

मुस्ताङ, असोज २६ गते । अविरल वर्षासँगै आएको बाढीपहिरो र नदी कटानका कारण मुस्ताङमा रोकिएका पाँच सयभन्दा बढी कन्टेनर तथा ट्रकहरू गन्तव्यतर्फ प्रस्थान गरेका छन्।

कालीगण्डकी करिडोरको बेनी–जोमसोम–कोरला सडक खण्ड अवरुद्ध भएपछि करिब दुई सातादेखि मुस्ताङमा रोकिएका ५३६ वटा कन्टेनर तथा ट्रकहरू आइतबार साँझसम्म मुस्ताङको घाँसाबाट बाहिरिएका हुन्।

जिल्ला प्रहरी कार्यालय मुस्ताङका अनुसार एकतर्फी रूपमा सञ्चालनमा आएको सडकखण्डमार्फत असोज १५ गतेदेखि २५ गतेसम्म क्रमशः कन्टेनरहरूलाई बाहिर पठाइएको हो। विशेष गरी असोज २५ गते सबैभन्दा बढी १८० वटा कन्टेनरहरू बाहिरिएको प्रहरीले जनाएको छ। मुस्ताङमा रोकिएका कन्टेनर र स्याउ बोक्ने ट्रकहरूलाई पहिलो प्राथमिकतामा राखिएको छ।

यसै अवधिमा लेते र घाँसा नाकाबाट १६ वटा विद्युतीय सवारी साधन (ईभी) समेत बाहिरिएका छन्। मुस्ताङ र म्याग्दीको सीमावर्ती क्षेत्र घाँसामा अझै २५ वटा विद्युतीय सवारी साधन र दुईवटा कन्टेनर रोकिएको र ती सवारी साधनहरूलाई पनि पास गराउने तयारी भइरहेको प्रहरीले जानकारी दिएको छ।