त्रिविको बेरुजुमा चिन्ताजनक वृद्धि: वार्षिक बजेटभन्दा बढी पुग्यो बेरुजु रकम

काठमाडौँ, असोज २७ गते । त्रिभुवन विश्वविद्यालय (त्रिवि) ले बेरुजु घटाउने अभियानलाई प्राथमिकता दिए तापनि आर्थिक अनियमितता र बेरुजु रकममा निरन्तर वृद्धि भइरहेको छ।

महालेखा परीक्षकको ६३औँ प्रतिवेदन अनुसार त्रिविको कुल बेरुजु ३२ अर्ब ९८ करोड २६ लाख ८५ हजार रुपैयाँ पुगेको छ, जुन विश्वविद्यालयको चालु आर्थिक वर्षको कुल बजेटभन्दा समेत करिब दुई अर्ब रुपैयाँले बढी हो।

गत वर्षको तुलनामा त्रिविको बेरुजुमा उल्टै दुई अर्ब ४४ करोड ६९ लाख ९९ हजार रुपैयाँले वृद्धि भएको छ। विश्वविद्यालय सभाले चालु आर्थिक वर्ष २०८३/८४ का लागि ३० अर्ब ८७ करोड ११ लाख आठ हजार रुपैयाँको बजेट पारित गरे पनि बढ्दो बेरुजुले आर्थिक लक्ष्य हासिल गर्न ठूलो चुनौती सिर्जना गरेको छ।

बेरुजु नियन्त्रण तथा समपरीक्षणका लागि त्रिविले विभिन्न निकायहरूमा लेखा परीक्षण सम्पन्न गर्ने तथा खर्च कटौतीको नीति लिएको छ। स्वायत्तता प्राप्त निकायहरूले गर्ने जथाभाबी खर्चलाई निरुत्साहित गर्दै आर्थिक अनुशासन कायम गर्न त्रिवि नेतृत्वले विशेष व्यवस्था मिलाउने तयारी गरिरहेको छ।

बेरुजु शून्य बनाउने उद्देश्यसहित त्रिविले सम्बद्ध निकायहरूलाई प्रोत्साहन पुरस्कार दिने नीति पनि अगाडि बढाएको छ। आर्थिक स्रोतको पहिचान, परिचालन र प्रभावकारी अनुगमनमार्फत आगामी दिनमा बेरुजु घटाउने विश्वास विश्वविद्यालयले लिएको छ।