पार्टीभित्रको तिक्तता अन्त्य गरेर अलग भएका मतदाताको घरदैलोमा पुग्छौँ : सभापति गगनकुमार थापा

पोखरा, कात्तिक १० गते । नेपाली कांग्रेसका सभापति गगनकुमार थापाले पार्टीभित्रको आन्तरिक तिक्तता अन्त्य गर्दै कांग्रेसबाट टाढिएका मतदाताहरूको घरदैलोमा पुगेर पुनःसंवाद थाल्ने बताएका छन्।

बीपी स्मृति पुस्तकालय गण्डकी प्रदेशद्वारा मंगलबार पोखरामा आयोजित विशेष सम्मान तथा शुभकामना कार्यक्रमलाई सम्बोधन गर्दै उनले ११३औँ बीपी जयन्तीको अवसर पारेर विगतमा कांग्रेससँग आबद्ध रहेका तर हाल अलग भएका करिब दुई लाखभन्दा बढी परिवारसँग जोड्न विशेष अभियान सञ्चालन गर्ने जानकारी दिए। पार्टीको आन्तरिक एकतालाई मजबुत बनाउन पाका नेताहरूको अनुभव र युवाहरूको ऊर्जाबीचको समन्वय अपरिहार्य रहेको उनले औँल्याए।

सभापति थापाले आफ्नो चार वर्षे कार्यकालमा निष्ठापूर्वक काम गर्ने प्रतिबद्धता व्यक्त गर्दै नेताहरूलाई भड्किलो जीवनशैली त्यागेर गाउँ–गाउँमा खटिन कड़ा निर्देशन दिएका छन्। पार्टीको सांगठनिक सुदृढीकरणका लागि आगामी स्थानीय तहको निर्वाचनमा उम्मेदवार छनोट गर्ने अधिकार केन्द्रबाट नभई तल्लो तहलाई नै दिइने स्पष्ट पारे। पार्टीभित्र २० देखि ८० वर्षसम्मका चार पुस्ता क्रियाशील रहेको उल्लेख गर्दै उनले सबैको साथ र सहकार्यबाट मात्रै पार्टीलाई जनताको विश्वासको केन्द्र बनाउन सकिने बताए।

कार्यक्रममा सभापति थापाले नेपाली कांग्रेसमा रहेर विशिष्ट योगदान पुर्‍याएका गण्डकी प्रदेशका ११ वटै जिल्लाका एक–एक जना ज्येष्ठ तथा समर्पित व्यक्तित्वहरूलाई जनही २५ हजार रुपैयाँ, सम्मानपत्र र दोसल्लासहित सम्मानित गरेका थिए। सम्मानित हुनेहरूमा नवलपुरकी सुमित्रादेवी खनाल, गोरखाका राममणि धिताल, लमजुङका नवीन बानियाँ, तनहुँका झपटबहादुर केसी, मनाङका पेम्बा दोर्जे लामा, कास्कीका कृष्णबहादुर कुँवर, स्याङ्जाका शालिकराम न्यौपाने, पर्वतका बलभद्र शर्मा, बागलुङका हरिप्रसाद श्रेष्ठ, म्याग्दीका पृथ्वीमान छन्त्याल र मुस्ताङका सोनम धोर्जे विष्ट रहेका छन्।