मलेसियासँगको श्रम समस्या समाधान गर्न कूटनीतिक पहल तीव्र : संयुक्त कार्यदलको बैठक बस्ने प्रस्ताव, २५ म्यानपावरमाथि अनुगमन सुरु

काठमाडौँ, कात्तिक ११ गते । सरकारले नेपाल र मलेसियाबीच श्रमिक छनोट तथा भर्ना प्रक्रियामा देखिएका विषयहरूलाई आपसी संवाद र समझदारीका माध्यमबाट समाधान गर्न कूटनीतिक पहल अगाडि बढाएको छ।

श्रम मन्त्रालयले मलेसियाली पक्षलाई औपचारिक पत्राचार गर्दै एफडब्लुसिएमएस प्रणालीअन्तर्गत नेपाली श्रमिकको भर्ना प्रक्रिया र अन्य श्रम आप्रवासनका सवालमा द्विपक्षीय छलफलका लागि संयुक्त कार्यदलको बैठक काठमाडौँमा गर्न प्रस्ताव गरेको हो। नेपालले उक्त बैठकका लागि आगामी मङ्सिर २–३ वा १६–१७ गते (सन् २०२६ नोभेम्बर १८–१९ वा डिसेम्बर २–३) को मिति प्रस्ताव गर्दै आपसी सहमतिबाट नयाँ व्यवस्था नभएसम्म विद्यमान प्रक्रियालाई निरन्तरता दिनुपर्नेमा जोड दिएको छ।

प्रस्तावित बैठकमा श्रमिक छनोट प्रक्रियालाई थप पारदर्शी र श्रमिकमैत्री बनाउने विषयका साथै सन् २०१८ मा भएको श्रम समझदारीपत्रको नवीकरणसम्बन्धी मसौदालाई अन्तिम रूप दिने एजेन्डा राखिएको छ। नेपाल वैदेशिक रोजगार व्यवसायी सङ्घले सरकारको यस कूटनीतिक पहलको स्वागत गर्दै यसलाई ठोस परिणाममा परिणत गर्नुपर्ने बताएको छ। सङ्घका अध्यक्ष डिकबहादुर खत्रीले मलेसियामा देखिएका समस्या समाधानका लागि नेपाली श्रमिकको हितलाई सर्वोपरि राखेर निर्णय गर्नुपर्नेमा जोड दिएका छन्।

यसैबीच, वैदेशिक रोजगार विभागले मलेसियाद्वारा छनोट गरिएका २५ वटा म्यानपावर कम्पनीहरूले एकाधिकार कायम गरी प्रणालीमा आबद्ध भएको विषयमा कानुनी अनुसन्धान तथा अनुगमन थालेको छ। विभागका महानिर्देशक नवराज ढकालले कानुनविपरीत सीमित संस्थाको एकाधिकार स्वीकार्य नहुने स्पष्ट पार्दै यससम्बन्धी कानुनी प्रक्रिया र अनुसन्धानका लागि अधिकृत तोकेर काम अगाडि बढाइएको जानकारी दिएका छन्।