जैविक विविधता संरक्षणमा नेपालको प्रतिबद्धता : “महत्त्वाकाङ्क्षादेखि कार्यान्वयनसम्म” विषयक कार्यक्रम सम्पन्न

काठमाडौँ, कात्तिक ११ गते । नेपालको राष्ट्रिय जैविक विविधता रणनीति तथा कार्ययोजनाको प्रभावकारी कार्यान्वयन र सन् २०३० सम्मका जैविक विविधतासम्बन्धी लक्ष्यहरू हासिल गर्ने नेपालको प्रतिबद्धता उजागर गर्ने उद्देश्यले “नेपालको जैविक विविधतासम्बन्धी दृष्टिकोणः महत्त्वाकाङ्क्षादेखि कार्यान्वयनसम्म” शीर्षकको विशेष कार्यक्रम सम्पन्न भएको छ।

कार्यक्रममा संयुक्त राष्ट्रसङ्घीय विकास कार्यक्रम (युएनडीपी) द्वारा नेपालको रणनीतिसम्बन्धी भिडियो प्रस्तुति गरिएको थियो, जसले संरक्षणप्रतिको राज्यको दृढ संकल्पलाई प्रष्ट्याएको छ। कार्यक्रममा कृषि, वन तथा पर्यावरण मन्त्रालयकी मन्त्री गिता चौधरीले पारिस्थितिकीय प्रणालीको संरक्षण, खाद्य सुरक्षा र वातावरणीय उत्थानशीलतामा जैविक विविधताको अपरिहार्यतामाथि जोड दिनुभयो।

कार्यक्रममा जैविक विविधतासम्बन्धी महासन्धि (सिबीडी) का प्रतिनिधि क्यू. अपाज तथा युएनडीपीका क्षेत्रीय प्रतिनिधिले सामूहिक प्रतिबद्धता, प्रभावकारी कार्यान्वयन र दिगो वित्तीय स्रोत परिचालनको आवश्यकता औँल्याउनुभयो। सो अवसरमा आयोजित प्यानल छलफलमा मन्त्रालय, युवा सञ्जाल, आदिवासी जनजाति, स्थानीय समुदाय, इसिमोड र युएनडीपीका प्रतिनिधिहरूको सहभागिता रहेको थियो। ग्लोबल योथ बायोडाइभर्सिटी नेटवर्क (जीवाइबीएन) की प्रतिनिधि श्रेयाले नीति निर्माणमा युवाको अर्थपूर्ण सहभागिता हुनुपर्ने बताइन् भने आदिवासी जनजाति प्रतिनिधि कमल राईले सन् २०३० सम्मका लक्ष्य पूरा गर्न समुदाय स्तरबाटै सक्रिय योगदान रहने प्रतिबद्धता व्यक्त गरे।

यस कार्यक्रमले राष्ट्रिय रणनीतिलाई व्यवहारमा रूपान्तरण गर्न समावेशी शासन व्यवस्था, पर्याप्त स्रोतसाधन र समाजका सबै तहको सामूहिक प्रयास अपरिहार्य रहेको साझा सन्देश प्रवाह गरेको छ। नेपालले लिएका जैविक विविधतासम्बन्धी लक्ष्यहरूलाई मापनयोग्य उपलब्धिसहित कार्यान्वयनमा लैजान यो कार्यक्रमले थप उर्जा प्रदान गरेको छ।