बुद्ध जन्मस्थल लुम्बिनीमा विदेशी पर्यटकको आगमन बढ्दै, तर तेस्रो मुलुकका पर्यटक अझै कोभिडअघिको स्तरमा छैनन्

लुम्बिनी, असोज २७ गते । बुद्ध जन्मस्थल लुम्बिनीमा पर्यटकको कुल आगमनमा सुधार देखिए पनि तेस्रो मुलुकबाट आउने विदेशी पर्यटकहरूको सङ्ख्या भने कोभिड महामारीअघिको अवस्थामा फर्किन सकेको छैन।

लुम्बिनी विकास कोषका अनुसार यस वर्षको पहिलो नौ महिनामा कुल पर्यटक आगमन बढेको भए पनि तेस्रो मुलुकका पर्यटकहरूको सङ्ख्या सन् २०१९ को तुलनामा न्यून रहेको छ।

सन् २०२६ को जनवरीदेखि सेप्टेम्बरसम्मको अवधिमा ८५ हजार २४४ जना तेस्रो मुलुकका पर्यटकले लुम्बिनी भ्रमण गरेका छन्। यो सङ्ख्या सन् २०१९ को सोही अवधिको तुलनामा २४ हजार ६५२ ले कम हो। सन् २०१९ को पहिलो नौ महिनामा एक लाख नौ हजार ८९६ जना तेस्रो मुलुकका पर्यटक आएका थिए।

यस वर्षको पहिलो नौ महिनामा लुम्बिनी भ्रमण गर्ने कुल पर्यटकको सङ्ख्या सात लाख ९२ हजार १८८ पुगेको छ, जुन गत वर्षको तुलनामा ६.८३ प्रतिशतले बढी हो। लुम्बिनीमा आउने पर्यटकमध्ये सबैभन्दा ठुलो हिस्सा आन्तरिक पर्यटकको रहेको छ भने भारतबाट आउने पर्यटकको सङ्ख्यामा पनि उल्लेख्य वृद्धि भएको छ।

तेस्रो मुलुकबाट आउने पर्यटकमध्ये सबैभन्दा धेरै श्रीलङ्काका नागरिक रहेका छन् भने त्यसपछि म्यानमार, चीन र थाइल्यान्डका पर्यटकले लुम्बिनी भ्रमण गरेका छन्। आगामी कात्तिकदेखि चैतसम्म मुख्य पर्यटकीय मौसम सुरु हुने भएकाले पर्यटक आगमनले थप गति लिने अपेक्षा गरिएको छ।

लुम्बिनी पर्यटन आगमनसम्बन्धी मुख्य तथ्याङ्कहरूको तालिका