थाहा नगरपालिकाको सुनाखरी पैदलमार्गमा विदेशी पर्यटकको आकर्षण : चित्लाङ–सिमभञ्ज्याङ पदमार्गमा पर्यटक भित्रिए

मकवानपुर, कात्तिक २६ गते । थाहा नगरपालिकाको चित्लाङदेखि सिमभञ्ज्याङसम्म फैलिएको आकर्षक ‘सुनाखरी पैदलमार्ग’ मा विदेशी पर्यटकहरूको आगमन सुरु भएको छ।

गत २०८२ भदौ १७ गते उक्त पैदलमार्गको नक्सा सार्वजनिक भएको छोटो समयमै अमेरिका, युरोप र अस्ट्रेलियाबाट आएका २१ जना पर्यटकको टोलीले यस मार्गको पहिलो भ्रमण सम्पन्न गरेको हो।

वनस्पति विज्ञ डा. भक्तबहादुर रास्कोटीको नेतृत्वमा आएको उक्त अन्तर्राष्ट्रिय पर्यटक टोलीले सोमबारदेखि बुधबारसम्म चित्लाङ–सिमभञ्ज्याङ पदमार्गको अवलोकन भ्रमण गरेको छ। सिमभञ्ज्याङमा स्थानीय जनप्रतिनिधि, वन उपभोक्ता समिति तथा क्लबका पदाधिकारीहरूले विदेशी पाहुनाहरूलाई भव्य स्वागत गरेका थिए।

थाहा नगरपालिका क्षेत्र प्राकृतिक विविधता र सुनाखरीका दृष्टिले अत्यन्त महत्त्वपूर्ण मानिन्छ। मकवानपुरको भैँसेदेखि थाहा नगरपालिकाको चित्लाङसम्म १ सय ५० प्रजातिका सुनाखरी पाइने भए पनि विशेषगरी सिमभञ्ज्याङ र दामन क्षेत्रमा विविध प्रजातिका सुनाखरीहरू रहेका छन्। यसै मौसममा मात्रै यहाँ १५ प्रजातिका सुनाखरी फुलेको अवलोकन गर्न सकिने भएकाले प्राकृतिक वनस्पति र जैविक विविधतामा रुचि राख्ने देशीविदेशी पर्यटकहरूका लागि यो पैदलमार्ग एक प्रमुख आकर्षणको गन्तव्य बन्दै गएको छ।

यस पैदलमार्गको पहिचान, नक्साङ्कन र राष्ट्रिय तथा अन्तर्राष्ट्रियस्तरमा भएको प्रचारप्रसारले थाहा नगरपालिकाको प्राकृतिक पर्यटन विकासमा नयाँ सम्भावनाको ढोका खोलेको छ। सुनाखरीलाई पर्यटनसँग जोडेर यसको संरक्षण र संवर्द्धन गर्न सकेमा स्थानीय स्तरमा पर्यटन व्यवसाय फस्टाउने, रोजगारीका अवसर सिर्जना हुने र समग्र आर्थिक गतिविधि विस्तारमा ठुलो टेवा पुग्ने अपेक्षा गरिएको छ।

थाहा नगरपालिकाका मेयर विष्णु विष्टले थाहालाई जैविक विविधता तथा प्रकृतिमा आधारित पर्यटनको एक महत्त्वपूर्ण गन्तव्यका रूपमा विकास गर्न यो अभियानले बलियो आधार तयार गरेको बताउनुभएको छ। विदेशी पर्यटकहरूको यो पहिलो आगमनले यस क्षेत्रको पर्यटन प्रवर्द्धनमा थप उत्साह थपेको छ।