बाढीले क्षति पुर्‍याएको रसुवाको गोसाइँकुण्ड क्षेत्रमा पर्यटकको आगमन पुनः बढ्न थाल्यो

रसुवा, कात्तिक २६ गते । धार्मिक आस्था, प्राकृतिक सौन्दर्य र जैविक विविधताले भरिपूर्ण रसुवाको प्रसिद्ध तीर्थस्थल गोसाइँकुण्डमा आन्तरिक तथा बाह्य पर्यटकको आगमन पुनः बढ्न थालेको छ।

गत भदौ १० गते भोटेकोशी नदीमा आएको विनाशकारी बाढीका कारण सडक तथा पदमार्गमा ठुलो क्षति पुगेपछि यस क्षेत्रको पर्यटन व्यवसाय केही समयका लागि सुस्ताएको थियो।

गोसाइँकुण्ड गाउँपालिकाका अध्यक्ष कैसाङ नुर्पु तामाङले अवरुद्ध मार्गहरू खुल्दै गएपछि र आवागमन सहज बन्दै गएपछि प्रभावित पर्यटन क्षेत्र पुनः चलायमान हुन थालेको जानकारी दिनुभयो। पर्यटकको आगमन बढेसँगै होटल व्यवसायी, पथप्रदर्शक, यातायात मजदुर तथा अन्य साना व्यवसायीहरूमा पुनः उत्साह छाएको छ।

लाङटाङ राष्ट्रिय निकुञ्जका सूचना अधिकारी एवं संरक्षण अधिकृत गणेशप्रसाद तिवारीले आवागमन नियमित भएसँगै गोसाइँकुण्ड क्षेत्रमा पदयात्री तथा तीर्थयात्रीहरूको उपस्थिति बाक्लो हुन थालेको बताउनुभयो। नागरिक समाज रसुवाका अध्यक्ष बाबुलाल तामाङले पनि सडक र पदमार्गको अवस्था सुधार भएपछि गोसाइँकुण्ड आउनेहरूको सङ्ख्यामा उल्लेख्य वृद्धि भएको पुष्टि गर्नुभयो।

स्थानीय होटल व्यवसायी सन्तोष घलेका अनुसार पहिले जनैपूर्णिमा र गङ्गादशहराका अवसरमा मात्र घुइँचो लाग्ने गरेकामा पछिल्लो समय वर्षभरिजसो नै आन्तरिक पर्यटक र युवापुस्ता घुमफिरका लागि आउने क्रम बढेको छ।

समुद्री सतहबाट चार हजार ३८० मिटर उचाइमा अवस्थित गोसाइँकुण्ड हिन्दू तथा बौद्ध धर्मावलम्बीहरूको साझा र पवित्र आस्थाको केन्द्र हो। पौराणिक मान्यता अनुसार समुद्र मन्थनको कालकूट विष सेवनपछि डाहा शान्त पार्न भगवान् शिवले त्रिशूल प्रहार गरेर पानी निकालेको र त्यही जलबाट यो कुण्ड बनेको जनविश्वास रहिआएको छ।

यस क्षेत्रमा गोसाइँकुण्डबाहेक भैरवकुण्ड, सरस्वतीकुण्ड, सूर्यकुण्ड, चन्द्रकुण्ड, दूधकुण्ड र गणेशकुण्डसहित ऐतिहासिक अमरसिंह गुफा तथा तामाङ समुदायको मौलिक संस्कृति समेत पर्यटकका लागि प्रमुख आकर्षणका केन्द्र बनेका छन्।

पारिस्थितिकीय महत्त्वका कारण सन् २००७ सेप्टेम्बर २३ मा रामसार सूचीमा सूचीकृत यस क्षेत्रमा हिमचितुवा, रातो हाब्रे र कस्तुरी मृग जस्ता दुर्लभ वन्यजन्तुसहित विभिन्न हिमाली वनस्पति पाइन्छन्। पदमार्गको दिगो स्तरोन्नति र पूर्वाधार विकासमा ध्यान दिन सके यस क्षेत्रले राष्ट्रिय अर्थतन्त्रमा अझ ठुलो योगदान पुर्‍याउने विश्वास लिइएको छ।